જામનગર: શહેરના શાંત ગણાતા વિસ્તારમાં એક મૂંગા અને નિર્દોષ શ્વાન પર લોખંડની અથવા મજબૂત લાકડાની હોકી વડે જીવલેણ હુમલો કરવામાં આવ્યો હોવાની શરમજનક ઘટના સામે આવી છે. આ ક્રૂરતાનો લાઈવ વીડિયો સોશિયલ મીડિયામાં વાયરલ થતાં જ સમગ્ર પંથકમાં ચકચાર મચી ગઈ છે અને પશુપ્રેમીઓમાં ભારે આક્રોશ ફાટી નીકળ્યો છે. 

મળતી માહિતી મુજબ, આ ચકચારી ઘટના જામનગરના કામદાર કોલોની શેરી નંબર-2 વિસ્તારમાં બની છે. અહીં કોઈ અગમ્ય કારણોસર એક શખ્સે ક્રૂરતાની તમામ સીમાઓ વટાવી દીધી હતી. તેણે રસ્તા પર ઉભેલા એક અબોલ શ્વાનને નિશાન બનાવી તેના પર હોકી વડે ઉપરાછાપરી ઘા ઝીંકી દીધા હતા. હુમલો એટલો ભયાનક હતો કે હોકીના ફટકા સીધા શ્વાનના માથાના ભાગે વાગ્યા હતા, જેને કારણે શ્વાન ત્યાં જ ઢળી પડ્યો હતો.

હુમલાના કારણે નિર્દોષ શ્વાનના માથામાંથી અતિશય લોહી વહી ગયું હતું અને તે કણસતી હાલતમાં તરફડી રહ્યો હતો. ઘટનાની જાણ સ્થાનિક જીવદયાપ્રેમીઓ અને એનજીઓની ટીમને થતાં જ તેઓ તાત્કાલિક ઘટનાસ્થળે દોડી આવ્યા હતા. લોહીલુહાણ હાલતમાં શ્વાનને તાકીદે પશુ હોસ્પિટલ ખાતે સારવાર માટે ખસેડવામાં આવ્યો છે. પશુ ચિકિત્સકોના જણાવ્યા અનુસાર, માથામાં ગંભીર ઈજા અને વધુ પડતો રક્તસ્ત્રાવ થવાના કારણે હાલ શ્વાનની સ્થિતિ અત્યંત નાજુક બનેલી છે.

આ સમગ્ર અમાનવીય ઘટના નજીકમાં લાગેલા એક CCTV કેમેરામાં કેદ થઈ ગઈ હતી. આ વીડિયો સોશિયલ મીડિયા પ્લેટફોર્મ્સ પર વાયરલ થતાં જ લોકોનો ગુસ્સો ફાટી નીકળ્યો છે. નેટીઝન્સ આ હિંસક કૃત્ય કરનાર વ્યક્તિ પર ભારે ફિટકાર વર્ષાવી રહ્યા છે. પ્રાણીઓ પ્રત્યેની આવી ક્રૂરતા જોઈને ફરી એકવાર સમાજમાં માનવતા અને પ્રાણીઓની સુરક્ષા સામે મોટા સવાલો ઉભા થયા છે.

આ ઘટનાને પગલે જામનગરના સ્થાનિક પશુપ્રેમીઓ અને જીવદયા મંડળોમાં ભારે રોષ જોવા મળી રહ્યો છે. એનિમલ રાઈટ્સ એક્ટ અંતર્ગત સીસીટીવી ફૂટેજના આધારે આ નરાધમ હુમલાખોરની ઓળખ કરી, તેની સામે ગુનો નોંધીને કડકમાં કડક કાયદેસરની કાર્યવાહી કરવામાં આવે તેવી ઉગ્ર માંગણી કરવામાં આવી રહી છે.