કોડીનારના દેવલપુર ગામે આત્મહત્યા તરીકે નોંધાયેલો એક ચોંકાવનારો કેસ આખરે હત્યામાં ફેરવાતા પંથકમાં ચકચાર મચી ગઈ છે. લગ્નના માત્ર ત્રણ મહિનાના ટૂંકા ગાળામાં જ એક યુવતીએ પોતાનો જીવ ગુમાવતા સમગ્ર પરિવાર આઘાતમાં સરી પડ્યો છે. પોલીસ તપાસમાં બહાર આવ્યું છે કે, આ આત્મહત્યા નહીં પરંતુ પતિ દ્વારા આચરવામાં આવેલી ક્રૂર હત્યા હતી.

પોલીસ તપાસમાં થયેલા ખુલાસા મુજબ, પતિ-પત્ની વચ્ચે ઘરગથ્થુ બાબતોને લઈને ઝઘડા થતા હતા. જેમાં જમવાની બનાવટ અને આર્થિક ખેંચતાણ  મુખ્ય કારણો હતા. ઝઘડા દરમિયાન આવેશમાં આવીને પતિએ પત્નીના બ્લાઉઝની દોરી વડે ગળું દબાવી તેની નિર્મમ હત્યા કરી નાખી હતી. ઘટનાને આત્મહત્યાનું રૂપ આપવા માટે આરોપીએ પ્રયાસ કર્યો હતો, પરંતુ પોલીસની સજ્જતાને કારણે સત્ય સામે આવ્યું છે.

મૃતકના પિતાની શંકાના આધારે નોંધાયેલી ફરિયાદ અને ત્યારબાદ કરવામાં આવેલ ફોરેન્સિક પોસ્ટમોર્ટમ રિપોર્ટમાં ગળું દબાવવાથી મોત થયાનું સ્પષ્ટ થતા પોલીસ દ્વારા કાયદેસરની કાર્યવાહી કરવામાં આવી છે. આ ગંભીર ગુનાના પગલે પોલીસે આરોપી પતિની અટકાયત કરી લીધી છે. હાલમાં પોલીસ દ્વારા વધુ પૂછપરછ અને તપાસ હાથ ધરવામાં આવી રહી છે, જેથી આ કેસમાં અન્ય કોઈની સંડોવણી છે કે નહીં તે જાણી શકાય. આ ઘટનાએ લગ્નજીવનની સુરક્ષા અને ગંભીર પારિવારિક ઝઘડાઓ સામે એક મોટો પ્રશ્ન ઊભો કર્યો છે.