વાંકાનેર  : વાંકાનેર તાલુકા પોલીસની ટીમે ગઈકાલે બાતમીના આધારે અરણીટીંબા ગામ નજીક વોચ ગોઠવીને વિદેશી દારૂની હેરાફેરી કરતા એક શખ્સને ઝડપી પાડ્યો છે. પોલીસ પેટ્રોલિંગ દરમિયાન સુકા ઘાસની આડમાં દારૂનો જથ્થો ભરેલી એક છકડો રિક્ષા પસાર થતા તેને અટકાવી હતી. તપાસ કરતા રિક્ષામાંથી અલગ-અલગ બ્રાન્ડની ૨૮૭ વિદેશી દારૂની બોટલો મળી આવી હતી, જેની કિંમત ૨.૧૩ લાખ રૂપિયા આંકવામાં આવી છે. પોલીસે આ કેસમાં બોટાદના રહેવાસી ૨૦ વર્ષીય રાજપાલસિંહ ઘનશ્યામસિંહ વાઘેલાની ઘટનાસ્થળેથી જ ધરપકડ કરી લીધી છે.

પોલીસની પ્રાથમિક તપાસ અને આરોપીની પૂછપરછમાં સામે આવ્યું છે કે, આ દારૂનો જથ્થો બોટાદના તરઘરા ગામના અજયભાઈ ખાચરે સપ્લાય કર્યો હતો અને તે વાંકાનેરના વીરવાવ ગામના અજયસિંહ હામુભા જાડેજાને પહોંચાડવાનો હતો. પોલીસે આરોપી પાસેથી દારૂ, રિક્ષા અને મોબાઈલ મળીને કુલ ૨.૭૩ લાખથી વધુનો મુદ્દામાલ જપ્ત કર્યો છે. દારૂના આ મોટા નેટવર્કમાં મુખ્ય આરોપીઓ તરીકે અજયભાઈ ખાચર અને અજયસિંહ જાડેજાના નામ ખુલતા, પોલીસ દ્વારા બંનેને વોન્ટેડ જાહેર કરવામાં આવ્યા છે.

વાંકાનેર તાલુકા પોલીસ ઇન્સ્પેક્ટર બી.વી. પટેલ અને તેમની ટીમ દ્વારા આ દારૂના નેટવર્કને તોડવા માટે ચક્રો ગતિમાન કરવામાં આવ્યા છે. આરોપીના મોબાઈલ ડેટા અને કોલ ડિટેઈલના આધારે વધુ તપાસ હાથ ધરવામાં આવી છે. પોલીસનું માનવું છે કે આ દારૂનું નેટવર્ક ઘણું લાંબુ હોઈ શકે છે અને અન્ય કયા લોકો આમાં સંડોવાયેલા છે તેની પણ ઊંડાણપૂર્વક તપાસ કરવામાં આવી રહી છે.

પકડાયેલા આરોપી રાજપાલસિંહ વાઘેલાને કોર્ટમાં રજૂ કરીને રિમાન્ડ મેળવવાની તજવીજ પોલીસ દ્વારા કરવામાં આવી રહી છે, જેથી વોન્ટેડ બંને શખ્સો સુધી પહોંચી શકાય. સમગ્ર રાજ્યમાં દારૂબંધી હોવા છતાં આ પ્રકારે સુકા ઘાસ કે પશુઆહારની આડમાં દારૂની હેરાફેરીના બનાવો સતત વધી રહ્યા છે, ત્યારે પોલીસે આ કેસને ખૂબ જ ગંભીરતાથી લઈને આગામી દિવસોમાં આરોપીઓની ધરપકડ માટે સર્ચ ઓપરેશન સઘન બનાવ્યું છે.