સણોસરા : સણોસરા ગામે ૭ વર્ષના માસૂમ બાળક સોહીલ પર જીવલેણ હુમલો કરી તેનો ભોગ લેનાર હિંસક દીપડો આખરે બે દિવસની ભારે જહેમત બાદ વન વિભાગના પાંજરે પુરાયો છે. વનતંત્રની ૩ અલગ-અલગ ટીમો દ્વારા હાથ ધરવામાં આવેલા સઘન કોમ્બિંગ ઓપરેશન દરમિયાન સણોસરા અને વાકિયાની સીમમાંથી કુલ બે દીપડા ઝડપાઈ ગયા છે, જેને પગલે ભયના ઓથાર હેઠળ જીવતા સ્થાનિક ગ્રામજનો અને ખેડૂતોમાં ફેલાયેલી દહેશત હળવી થઈ છે અને સૌએ હાશકારો અનુભવ્યો છે.
આ દુર્ઘટનામાં માસૂમ બાળકે પોતાનો જીવ ગુમાવતા સમગ્ર પંથકમાં શોકનું મોું ફરી વળ્યું હતું અને ખેતરોમાં કામ કરતા શ્રમિકોએ સૂર્યાસ્ત પછી ઘર બહાર નીકળવાનું બંધ કરી દીધું હતું. બનાવની ગંભીરતા પારખીને ઉચ્ચ વન સંરક્ષણ અધિકારીઓના માર્ગદર્શન હેઠળ તાત્કાલિક ત્રણ સ્પેશિયલ ટીમો બનાવીને સંભવિત રસ્તાઓ પર લોખંડી પાંજરા ગોઠવવામાં આવ્યા હતા અને કેમેરા દ્વારા સતત બે દિવસ સુધી મોનિટરિંગ કરાયું હતું. વનકર્મીઓની આ વ્યુહાત્મક મહેનત રંગ લાવી હતી અને મારણની લાલચે સણોસરામાંથી મુખ્ય હુમલાખોર દીપડો તથા વાકિયાની સીમમાંથી અન્ય એક દીપડો પાંજરામાં કેદ થઈ ગયા હતા.
પાંજરે પુરાયેલા બંને વન્યજીવોને સ્થળ પરથી સુરક્ષિત રીતે ક્રાકર્સ એનિમલ કેર સેન્ટર ખાતે ખસેડવામાં આવ્યા છે, જ્યાં પશુચિકિત્સકો દ્વારા તેમનું સંપૂર્ણ તબીબી પરીક્ષણ કરવામાં આવી રહ્યું છે. પ્રાણીઓના સ્વાસ્થ્ય અને વર્તણૂકની ચકાસણી કર્યા બાદ વરિષ્ઠ અધિકારીઓની મંજૂરી મેળવીને તેમને ઊંડા અભયારણ્ય વિસ્તારમાં મુક્ત કરવા અંગેનો અંતિમ નિર્ણય લેવામાં આવશે.
ઘટનાની ગંભીરતાને ધ્યાનમાં રાખીને વન વિભાગ દ્વારા સીમ વિસ્તારમાં રહેતા પરિવારોને રાત્રિના સમયે પૂરતી તકેદારી રાખવા, ખુલ્લામાં ન સૂવા અને નાના બાળકોને એકલા ન છોડવાની કડક તાકીદ કરવામાં આવી છે. સ્થાનિક સ્તરે સલામતી સુનિશ્ચિત કરવા માટે સંવેદનશીલ વિસ્તારોમાં તંત્ર દ્વારા રાઉન્ડ ધ ક્લોક પેટ્રોલિંગ સતત જારી રાખવામાં આવ્યું છે.