(મુકુંદ બદિયાણી દ્વારા)જામનગર તા.૨૬:  સ્થાનિક સ્વરાજ્યની ચૂંટણી-2026 અંતર્ગત આજે રવિવારે જામનગર 79, વિધાનસભા મતવિસ્તારના ધારાસભ્ય દિવ્યેશભાઈ અકબરીએ સહપરિવાર મતદાન મથકે પહોંચીને પોતાના મતાધિકારનો ઉપયોગ કર્યો હતો.

મતદાન કર્યા બાદ ધારાસભ્ય દિવ્યેશભાઈ અકબરીએ જણાવ્યું કે લોકશાહીના આ મહાપર્વમાં દરેક નાગરિકની સહભાગીદારી અત્યંત જરૂરી છે. મજબૂત અને વિકસિત શહેરના નિર્માણ માટે દરેક એક મત કિંમતી છે. તેમણે મતદારોને અપીલ કરતા કહ્યું કે ગરમી વધે તે પહેલા સવારના સમયે વધુમાં વધુ મતદાન કરો.

આ પ્રસંગે મતદાન મથક પર ભાજપના સ્થાનિક આગેવાનો અને કાર્યકરો પણ ઉપસ્થિત રહ્યા હતા. દિવ્યેશભાઈ અકબરીએ પરિવાર સાથે લાઈનમાં ઊભા રહીને સામાન્ય મતદારની જેમ મતદાન કર્યું હતું. તેમના આ પગલાને લોકોએ વધાવી લીધું હતું.

79, વિધાનસભા વિસ્તારમાં સવારથી જ મતદાન મથકો પર મતદારોનો સારો પ્રતિસાદ જોવા મળી રહ્યો છે.