(મુકુન્દ બદીયાણી દ્વારા) જામનગર : ભારત સરકારના નિર્દેશો અને સંરક્ષણ દળોના માર્ગદર્શન હેઠળ, હેડક્વાર્ટર ઇન્ટિગ્રેટેડ ડિફેન્સ સ્ટાફ (HQ IDS) તથા સાઉથ વેસ્ટર્ન એર કમાન્ડ (HQ SWAC)ના સહયોગથી જામનગર સ્થિત એરફોર્સ સ્ટેશન ખાતે આગામી ૧૭ થી ૧૯ નવેમ્બર ૨૦૨૬ દરમિયાન બહુ-રાષ્ટ્રીય માનવતાવાદી સહાય અને આપત્તિ રાહત (HADR) કવાયત 'સહાયતા સેતુ'નું ભવ્ય આયોજન કરવામાં આવ્યું છે. ભારતીય વાયુસેનાના નેજા હેઠળ યોજાનારી આ સંકલિત કવાયતમાં વિવિધ રાષ્ટ્રીય એજન્સીઓ સાથે મિત્ર વિદેશી દેશો પણ સહભાગી થશે.

આપત્તિ પ્રતિભાવ અને ટેક્નોલોજીકલ આવિષ્કાર પર ભાર:
આપદાઓ કોઈ ભૌગોલિક સીમાઓ જોતી નથી, તેથી કટોકટીના સમયમાં લોકોના કિંમતી જીવ બચાવવા માટે રાષ્ટ્રો અને એજન્સીઓ વચ્ચે સમયસર સહાય, અસરકારક સંકલન અને અવિરત સહયોગ અનિવાર્ય બને છે. આ કવાયતનો મુખ્ય ઉદ્દેશ્ય ટેક્નોલોજીકલ આવિષ્કારો દ્વારા આપત્તિ સામેની સામૂહિક તૈયારીઓને વધુ મજબૂત બનાવવાનો, આંતર-કાર્યક્ષમતા વધારવાનો અને એકીકૃત આપત્તિ પ્રતિભાવ પ્રણાલીને પ્રોત્સાહન આપવાનો છે. ભારતીય વાયુસેના પોતાની અત્યાધુનિક વ્યૂહાત્મક એરલિફ્ટ ક્ષમતાઓ, ઝડપી પ્રતિભાવ બળ અને રાહત કામગીરીના વ્યાપક અનુભવના બળે નાગરિક તંત્રને સહકાર આપી માનવતાવાદી સેવા પૂરી પાડવામાં અગ્રેસર ભૂમિકા ભજવી રહી છે.

પ્રતિષ્ઠિત મહાનુભાવોની ઉપસ્થિતિ અને આંતરરાષ્ટ્રીય સહયોગ:
આ પ્રતિષ્ઠિત કવાયતની સાક્ષી બનવા માટે દેશના માનનીય પ્રધાનમંત્રી, કેન્દ્રીય મંત્રીઓ, ગુજરાત રાજ્યના શીર્ષ મહાનુભાવો, ચીફ ઓફ ડિફેન્સ સ્ટાફ (CDS), ભારતીય સંરક્ષણ દળોના સેવા વડાઓ સહિતના અનેક અગ્રણીઓ ઉપસ્થિત રહેશે તેવી અપેક્ષા છે. આ મહાનુભાવોની ઉપસ્થિતિ ભારતની આંતરરાષ્ટ્રીય સહયોગ, આપત્તિ વ્યવસ્થાપન પૂર્વતૈયારી અને સામૂહિક સ્થિતિસ્થાપકતા પ્રત્યેની અડिग પ્રતિબદ્ધતાને વૈશ્વિક સ્તરે ઉજાગર કરશે.

વિશ્વબંધુત્વ અને સહિયારી જવાબદારીનો સંદેશ:
કાર્યકારી ઉદ્દેશ્યોની સાથોસાથ 'સહાયતા સેતુ' કવાયત આંતરરાષ્ટ્રીય મિત્રતા, એકતા અને માનવતાવાદી સેવા પ્રત્યેની સહિયારી જવાબદારીની ભાવનાને ગાઢ બનાવશે. આ આયોજન આ સિદ્ધાંતને પુષ્ટિ આપે છે કે અગાઉથી કરેલી પૂર્વતૈયારી, મજબૂત ભાગીદારી અને ત્વરિત કાર્યવાહી જ કુદરતી કે માનવસર્જિત આપદાઓ દરમિયાન જાનમાલનું નુકસાન અટકાવવામાં નિર્ણાયક સાબિત થાય છે.