(રહીમ વસાયા દ્વારા)મહુવા તા.૪ :  સવારથી જ અસહ્ય ઉકળાટ અને બફારાનો સામનો કરી રહેલા મહુવા શહેરના લોકોને આજે બપોરે મેઘરાજાએ રાહત આપી છે. 

     આજે બપોરે 2:30 કલાકે મહુવા શહેરમાં ગાજવીજ સાથે ધોધમાર વરસાદ તૂટી પડ્યો હતો. સવારથી જ વાતાવરણમાં રહેલી બફારો અને ગરમી બાદ અચાનક વાતાવરણ પલટાતા ધોધમાર સાંબેલાધારે વરસાદ શરૂ થયો છે.

મહુવા શહેરની સાથે-સાથે આજુબાજુના ગ્રામ્ય વિસ્તારોમાં પણ વરસાદના સમાચાર મળી રહ્યા છે. ગાજવીજ સાથે પડેલા વરસાદને કારણે વાતાવરણમાં ઠંડક પ્રસરી ગઈ છે.

જોકે, વરસાદ શરૂ થયાની થોડી જ વારમાં શહેરના નીચાણવાળા વિસ્તારો અને રસ્તાઓ પર ઠેર-ઠેર પાણી ભરાઈ ગયા હતા. જેના કારણે વાહનચાલકોને હાલાકીનો સામનો કરવો પડ્યો હતો.

સ્થાનિકોએ આ વરસાદને પાક માટે ફાયદાકારક ગણાવ્યો છે. હવામાન વિભાગે હજુ આગામી 24 કલાક હળવાથી મધ્યમ વરસાદની શક્યતા વ્યક્ત કરી છે.