જામજોધપુર- મોટી પાનેલી તા.૧ : જામજોધપુર APMC યાર્ડ ખાતે આજે બપોરે 12:40 કલાકે વાતાવરણમાં પલટો આવ્યો અને ધોધમાર વરસાદ તૂટી પડ્યો હતો. છેલ્લા કેટલાક દિવસથી ગરમી અને બફારાથી પરેશાન વેપારીઓ, ખેડૂતો અને મજૂરોને આ વરસાદથી મોટી રાહત મળી છે.

APMC યાર્ડમાં માલની આવક-જાવક વચ્ચે અચાનક શરૂ થયેલા વરસાદના કારણે યાર્ડના ખુલ્લા પટમાં પાણી ભરાઈ ગયા હતા. વેપારીઓએ માલ-સામાનને વરસાદથી બચાવવા તાડપત્રી ઢાંકવાની કામગીરી શરૂ કરી હતી. 

જામજોધપુર પંથકમાં સવારથી વાદળછાયું વાતાવરણ હતું. બપોરે 12:40 કલાકે વરસાદ શરૂ થતા જ ખેડૂતોમાં આનંદ છવાઈ ગયો હતો. ખરીફ પાકની વાવણી કરી ચૂકેલા ખેડૂતો માટે આ વરસાદ આશીર્વાદરૂપ બનશે. કપાસ, મગફળી અને સોયાબીન જેવા પાકોને જીવતદાન મળશે.

યાર્ડના વેપારીઓએ જણાવ્યું કે આ વરસાદથી આગામી દિવસોમાં કૃષિ જણસોની આવકમાં વધારો થવાની આશા છે. વરસાદના પગલે સમગ્ર પંથકના વાતાવરણમાં ઠંડક પ્રસરી ગઈ છે.(- ચંદ્રેશ પટેલ-મોટી પાનેલી)