​જામનગર: જામનગરમાં આર્થિક રીતે નબળા અને ગરીબ મજૂર પરિવારોને ટાર્ગેટ કરીને આચરવામાં આવેલા એક મસમોટા સાયબર ફ્રોડનો પર્દાફાશ થતાં ખળભળાટ મચી ગયો છે. સામાન્ય જરૂરિયાતો પૂરી કરવા કે નાની-મોટી લોન મેળવવાની આશાએ ગયેલા શ્રમિક પરિવારોના દસ્તાવેજોનો દુરુપયોગ કરીને તેમની જાણ બહાર ₹૧.૫ કરોડથી વધુના સાયબર ટ્રાન્ઝેક્શન માટેના શંકાસ્પદ બેંક ખાતાઓ (મ્યુલ એકાઉન્ટ્સ) ખોલાવી દેવામાં આવ્યા હોવાનો સનસનાટીભર્યો ખુલાસો થયો છે.

​મળતી વિગતો મુજબ, ઠગ ટોળકીએ સરકારી યોજનાઓ કે સરળ લોનની લાલચ આપીને ભોળા મજૂરો પાસેથી આધાર કાર્ડ, પાન કાર્ડ અને ફોટોગ્રાફ્સ મેળવી લીધા હતા. ત્યારબાદ એક બેંક કર્મચારીની કથિત મિલીભગતથી આ શ્રમિકોના નામે અલગ-અલગ બેંકોમાં ખાતાઓ ખોલાવી દેવાયા હતા. આ ખાતાઓનો ઉપયોગ દેશભરમાંથી આચરવામાં આવતી સાયબર ઠગાઈ અને મની લોન્ડરિંગના નાણાં ટ્રાન્સફર કરવા માટે કરવામાં આવતો હતો.

​જ્યારે અન્ય રાજ્યોની પોલીસ અને સાયબર સેલે આ અનધિકૃત ખાતાઓની તપાસ કરી ત્યારે અચાનક નિષ્દોષ મજૂરોના ઘરે નોટિસો આવતાં આ સમગ્ર નેટવર્કનો ભેદ ખુલ્લો પડ્યો હતો. કરોડો રૂપિયાના ફ્રોડમાં પોતાના નામ આવતાં જ શ્રમિક પરિવારો સ્તબ્ધ થઈ ગયા છે. જામનગર પોલીસે આ કૌભાંડમાં સામેલ બેંક કર્મચારી સહિત સાયબર ઠગોની મોડસ ઓપરેન્ડી અંગે ઊંડી તપાસ શરૂ કરી છે.