વેરાવળ : ઉત્તર ભારત તરફ મુસાફરી કરતા પ્રવાસીઓ માટે પશ્ચિમ રેલવે દ્વારા એક મહત્વનો નિર્ણય લેવામાં આવ્યો છે. લાંબા સમયથી ઉઠી રહેલી માંગને ધ્યાનમાં રાખીને, વેરાવળ અને હરિદ્વાર વચ્ચે સાપ્તાહિક સ્પેશિયલ ટ્રેન શરૂ કરવામાં આવી છે. આ વિશેષ ટ્રેનથી સૌરાષ્ટ્રના યાત્રિકોને હરિદ્વાર સુધીની મુસાફરીમાં ઘણી સુવિધા મળશે. પશ્ચિમ રેલવેના આ નિર્ણયથી ખાસ કરીને ધાર્મિક યાત્રાએ જતા શ્રદ્ધાળુઓમાં આનંદની લાગણી જોવા મળી છે.
જુલાઈમાં 4-4 ફેરા લગાવશે ટ્રેન
રેલવે વિભાગ દ્વારા આપવામાં આવેલી માહિતી મુજબ, આ સ્પેશિયલ ટ્રેન જુલાઈ માસ દરમિયાન બંને તરફ ચાર-ચાર ફેરા લગાવશે. આ ટ્રેન મુસાફરોની વધારાની ભીડને ધ્યાનમાં રાખીને ખાસ ભાડા સાથે ઓન-ડિમાન્ડ દોડાવવામાં આવશે.
ટ્રેનનું સમયપત્રક (Schedule):
•    વેરાવળ-હરિદ્વાર સ્પેશિયલ (09203): જુલાઈ મહિનાની 7, 14, 21 અને 28 તારીખે (દર મંગળવારે) વેરાવળથી સાંજે 16:05 વાગ્યે ઉપડશે અને બીજા દિવસે રાત્રે 20:40 વાગ્યે હરિદ્વાર પહોંચશે.
•    હરિદ્વાર-વેરાવળ સ્પેશિયલ (09204): જુલાઈ મહિનાની 8, 15, 22 અને 29 તારીખે (દર બુધવારે) હરિદ્વારથી રાત્રે 21:30 વાગ્યે રવાના થશે અને ત્રીજા દિવસે સવારે 09:45 વાગ્યે વેરાવળ પહોંચશે.
22 આધુનિક કોચ અને અનેક સ્ટોપેજ
મુસાફરોની સુવિધા માટે આ ટ્રેનમાં થર્ડ એસી, સ્લીપર અને જનરલ કોચ મળીને કુલ 22 આધુનિક કોચની વ્યવસ્થા કરવામાં આવી છે. આ ટ્રેન રૂટમાં જૂનાગઢ, જેતલસર, બોટાદ, ગાંધીગ્રામ, મહેસાણા, પાલનપુર, આબુરોડ, અજમેર, દિલ્હી, ગાઝિયાબાદ અને મેરઠ સહિતના મહત્વના સ્ટેશનો પર રોકાશે, જેથી અનેક શહેરના લોકોને આ સેવાનો લાભ મળી શકશે.
બુકિંગ આજથી શરૂ
આ સ્પેશિયલ ટ્રેન માટેની ટિકિટનું બુકિંગ આજથી એટલે કે 4 જુલાઈ, શનિવારથી શરૂ કરી દેવામાં આવ્યું છે. મુસાફરો નજીકના યાત્રી આરક્ષણ કેન્દ્ર (PRS) અથવા અધિકૃત IRCTC વેબસાઈટ પરથી પોતાની ટિકિટ બુક કરાવી શકે છે. ભાવનગર ડિવિઝનના વરિષ્ઠ મંડલ વાણિજ્ય પ્રબંધક અતુલ કુમાર ત્રિપાઠીએ જણાવ્યું હતું કે, રેલવે દ્વારા મુસાફરોને આ વિશેષ ટ્રેન સેવાનો વધુમાં વધુ લાભ લેવા અપીલ કરવામાં આવી છે. હાલમાં આ ટ્રેન જુલાઈ પૂરતી જ મર્યાદિત છે, પરંતુ ભવિષ્યમાં તેને રેગ્યુલર કરવા અંગે પણ રેલવે દ્વારા સકારાત્મક વિચારણા કરવામાં આવી રહી છે.