રાજકોટ, તા. ૩ :  સૌરાષ્‍ટ્રમાં લાંબા વિરામ બાદ મેઘરાજાએ મહેર કરતા ખરીફ વાવેતરમાં ફાયદો થયો છે. સૌરાષ્‍ટ્રમાં મુખ્‍યત્‍વે મગફળી, કપાસ અને સોયાબીનનું વાવેતર કરવામાં આવે છે. ઘણા ખેડૂતો મગ અને અડદ પણ વાવે છે. ધીમીધારનો વરસાદ ફાયદારૂપ થયો છે. હજુ કુવામાં પૂરતા પાણી આવ્‍યા ન હોવાથી વધુ વરસાદ થાય તો વધુ ફાયદો થઇ શકે તેમ છે. સામાન્‍ય રીતે દશેરાએ બજારમાં આવી જતી મગફળી આ વર્ષે દિવાળી ટાણે કે દિવાળી પછી બજારમાં આવે તેવા અત્‍યારના સંજોગો છે. ખેડૂતો અત્‍યારના વરસાદને કાચા સોના જેવો ગણાવી રહ્યા છે.

મગફળી ટુંકાગાળાનો પાક ગણાય છે. કપાસ લાંબા ગાળાનો પાક છે. તે દિવાળી પછી બજારમાં આવશે. દર વર્ષે મગફળી સામાન્‍ય રીતે નોરતા કે દશેરા સુધીમાં બજારમાં આવવા લાગે છે. આ વર્ષે છેલ્લા ૩૦ થી ૪૦ દિવસમાં જેતે વાવણી કરી છે તે મગફળી દિવાળી આસપાસ એટલે કે રાબેતા મુજબના સમય કરતા ૧પ થી રપ દિવસ મોડી આવશે.

ખેડૂત વર્તુળોનું કહેવું છે કે વાવેતર પર જેટલો વરસાદ થવો જોઇએ એટલો થયો નથી પણ છેલ્લા ત્રણ-ચાર દિવસમાં ધીમીધારે વરસાદ થયો તે ફાયદારૂપ છે. હજુ વરસાદ થોડો દિવસ ચાલુ રહે તો પણ નુકશાન નથી. મેઘરાજાની મહેરબાનીથી વાવેતર અને જમીન બન્નેને લાભ થયો છે. સૌરાષ્‍ટ્રમાં હજુ વરસાદી વાતાવરણ છે. ૧૬ આની પાક થવાની ખેડૂતોની આશા સજીવન થઇ છે.