રાજકોટ તા.૨૬: સ્થાનિક સ્વરાજની સંસ્થાઓની સામાન્ય ચૂંટણી-2026 અંતર્ગત આજે, 26 એપ્રિલ 2026ના રોજ અમરેલીમાં પૂર્વ વિપક્ષી નેતા અને પૂવૅ ધારાસભ્ય પરેશ ધાનાણીએ પોતાના મતાધિકારનો ઉપયોગ કર્યો હતો.

પરેશ ધાનાણી અમરેલી ખાતેના નિયત મતદાન મથકે સહપરિવાર પહોંચ્યા હતા અને લાઈનમાં ઊભા રહીને સામાન્ય નાગરિકની જેમ મતદાન કર્યું હતું. મતદાન બાદ તેમણે આંગળી પરની અમિટ શાહીનું નિશાન બતાવી લોકશાહીના આ પર્વમાં સહભાગી થવાનો સંદેશ આપ્યો હતો.

મીડિયા સાથેની વાતચીતમાં પરેશ ધાનાણીએ જણાવ્યું કે, "મતદાન એ લોકશાહીનો આત્મા છે. સ્થાનિક સ્વરાજ્યની ચૂંટણીઓ ગામથી લઈને શહેર સુધીના વિકાસની દિશા નક્કી કરે છે. દરેક નાગરિકે પોતાના વિસ્તારના ભવિષ્ય માટે અવશ્ય મતદાન કરવું જોઈએ." તેમણે યુવાનો અને પ્રથમ વખતના મતદારોને ખાસ અપીલ કરતા કહ્યું કે મતદાનથી વંચિત ન રહે.

મતદાન મથકે ઉપસ્થિત કાર્યકરો અને સ્થાનિક નાગરિકોએ તેમનું અભિવાદન કર્યું હતું. સમગ્ર અમરેલી જિલ્લામાં શાંતિપૂર્ણ માહોલમાં મતદાન પ્રક્રિયા ચાલી રહી છે.