સાવરકુંડલાઃ તા.૧, સાવરકુંડલા શહેર અને આસપાસના વિસ્‍તારમાં આજે બપોર બાદથી વરસાદે જોર પકડ્‍યું હતું. સતત બે કલાક સુધી પડેલા ભારે વરસાદને કારણે શહેરના નીચાણવાળા વિસ્‍તારોમાં પૂર જેવી સ્‍થિતિ સર્જાઈ હતી. રસ્‍તાઓ પર ઘૂંટણ સમા પાણી વહેતા થઈ ગયા હતા.

દરમિયાન શહેરના મુખ્‍ય માર્ગ પરથી પસાર થતો એક બાઇક ચાલક પાણીના ધસમસતા પ્રવાહમાં તણાવા લાગ્‍યો હતો. પ્રવાહ એટલો તેજ હતો કે બાઇક ચાલક સંતુલન ગુમાવી બેઠો અને બાઇક સહિત પાણીમાં ખેંચાવા લાગ્‍યો હતો. જોકે આસપાસ ઉભેલા સ્‍થાનિક લોકોએ સમયસૂચકતા વાપરી તુરંત દોડી જઈ ચાલકને સહી સલામત બહાર કાઢી લીધો હતો. બાઇક ચાલકનો આબાદ બચાવ થયો હતો, પરંતુ બાઇક પાણીમાં તણાઈ ગયું હતું.

ભારે વરસાદના કારણે અનેક સોસાયટીઓમાં પણ પાણી ઘૂસી ગયા હતા. તંત્ર દ્વારા નીચાણવાળા વિસ્‍તારના લોકોને સતર્ક રહેવા સૂચના આપવામાં આવી છે. હાલ વરસાદ ધીમો પડ્‍યો છે, પરંતુ હવામાન વિભાગે આગામી ૨૪ કલાક ભારે વરસાદની આગાહી કરી છે.