(મુકુંદ બદિયાણી દ્વારા)જામનગર તા.૩ :  શહેરમાં તુલસી હોટલની સામે આવેલ માધવ સ્ક્વેરના મેઈન મીટર બોક્સમાં શોર્ટ સર્કિટ થવાના કારણે આજે સવારે 09:42 કલાક આસપાસ આગ લાગી હતી. ફાયર વિભાગને જાણ થતાં જ ટીમ તાત્કાલિક ઘટનાસ્થળે દોડી ગઈ હતી.  

મેઈન મીટર બોક્સમાં આગ લાગવાના કારણે બિલ્ડિંગનો વીજ પુરવઠો પ્રભાવિત થયો હતો. સુરક્ષાના ભાગરૂપે તાત્કાલિક પાવર સપ્લાય બંધ કરાવવામાં આવ્યો હતો. આ દરમિયાન લિફ્ટમાં એક વ્યક્તિ ફસાઈ ગયેલ હોવાનું જાણવા મળતાં ફાયર ટીમે ઝડપી અને સુરક્ષિત રેસ્ક્યૂ કામગીરી હાથ ધરી હતી. ફાયરની ટીમે લિફ્ટમાં ફસાયેલા વ્યક્તિને સહીસલામત બહાર કાઢ્યો હતો.  

આ ઘટનામાં ફાયર વ્હીકલ દ્વારા ફાયર ફાઈટિંગ કરવાની જરૂર પડી ન હતી. સદનસીબે આ બનાવમાં કોઈ જાનહાનિ થઈ નથી. ફાયર વિભાગની સમયસૂચકતાના કારણે મોટી દુર્ઘટના ટળી હતી.(તસવીર : કિંજલ કારસરીયા, જામનગર)