કચ્છ  જિલ્લાના ભચાઉ શહેરમાં કાયદો અને વ્યવસ્થાની સ્થિતિ સામે ગંભીર સવાલો ઉભા કરતી એક ચોંકાવનારી ઘટના સામે આવી છે. ભચાઉ શહેરમાં અસામાજિક તત્વો અને તસ્કરોનો ત્રાસ દિવસે-દિવસે વધી રહ્યો છે, જેનું જીવંત ઉદાહરણ આજે નગરપાલિકા કચેરીની આસપાસ સ્થિત વિસ્તારમાં જોવા મળ્યું છે. અહીં Bank of Baroda (BoB) નું ATM મશીન તસ્કરો દ્વારા નિશાન બનાવવામાં આવ્યું હતું અને તેને તોડી નાખવામાં આવ્યું હતું. આ ઘટનાને કારણે સ્થાનિક વેપારીઓ અને નાગરિકોમાં ભારે ચકચાર તથા ભયનો માહોલ ફેલાઈ ગયો છે.

પ્રાપ્ત વિગતો મુજબ, તસ્કરો દ્વારા એટીએમ સેન્ટરમાં ઘૂસીને કેશ ડિપોઝિટ મશીન (CDM) અને એટીએમ મશીનને તોડવાનો ઘાતકી પ્રયાસ કરવામાં આવ્યો હતો. સદભાગ્યે, તસ્કરો રોકડ રકમ ચોરી જવામાં નિષ્ફળ રહ્યા હતા, પરંતુ તેમની આ તોડફોડના કારણે CDM મશીનને ભારે નુકસાન પહોંચ્યું છે. નગરપાલિકા જેવા જાહેર અને વરદી વાળા વિસ્તારમાં આ પ્રકારે એટીએમને તોડી નાખવાની ઘટના બનતા રાત્રિના સમયે પોલીસ પેટ્રોલિંગ અને નાકાબંધીની કામગીરી સામે લોકો દ્વારા અનેક ગંભીર સવાલો ઉઠાવવામાં આવી રહ્યા છે.

આ ગંભીર બનાવની જાણ થતાં જ ભચાઉ પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો. પોલીસે એટીએમ સેન્ટરની અંદર અને બહાર લાગેલા CCTV કેમેરાના ફૂટેજ મેળવીને તપાસ શરૂ કરી દીધી છે. પોલીસ દ્વારા આસપાસના રસ્તાઓ પરના ફૂટેજ ચકાસીને આ ગુનાને અંજામ આપનાર અજાણ્યા તસ્કરોને ઝડપી પાડવા માટે ચક્રો ગતિમાન કરવામાં આવ્યા છે. તહેવારોના માહોલ વચ્ચે બનેલી આ ઘટનાને પગલે પોલીસ દ્વારા શહેરમાં સઘન તપાસ અને ચેકિંગ અભિયાન શરૂ કરવામાં આવ્યું છે.