કેન્દ્રશાસિત પ્રદેશ દીવના ઘોઘલા ગામે ગત 25 સપ્ટેમ્બરના રોજ ગણેશ વિસર્જનની શોભાયાત્રા દરમિયાન એક અત્યંત ગંભીર માર્ગ અકસ્માત સર્જાયો હતો. પૂરપાટ ઝડપે આવી રહેલી એક સ્વિફ્ટ કારના ચાલકે ગણેશ વિસર્જનમાં શ્રદ્ધાપૂર્વક જઈ રહેલા નિર્દોષ શ્રદ્ધાળુઓને જોરદાર અડફેટે લીધા હતા. આ ભયાનક અકસ્માતમાં આશરે 8થી વધુ લોકો ગંભીર રીતે ઘવાયા હતા, જેના પગલે વિસર્જનના પવિત્ર માહોલમાં ભારે અફરાતફરી અને આક્રંદ છવાઈ ગયો હતો.

આ ગમખ્વાર અકસ્માતમાં ગંભીર રીતે ઘવાયેલા 57 વર્ષીય વૃદ્ધા જયશ્રીબેન મહેન્દ્રભાઈ કાપડિયાને તાત્કાલિક ધોરણે હોસ્પિટલમાં સારવાર અર્થે દાખલ કરવામાં આવ્યા હતા. જોકે, લાંબી અને સઘન સારવાર બાદ પણ તેમની સ્થિતિમાં સુધારો ન થતાં આખરે તેમનું કરૂણ અવસાન થયું છે. વૃદ્ધાના મોતની ખબર મળતાં જ તેમના પરિવારજનો અને ઘોઘલા ગામમાં ભારે શોકની કાલિમા છવાઈ ગઈ છે. મૃતકના મૃત્દેહને પોસ્ટમોર્ટમ (PM) અર્થે નજીકના ઉના ખાતે ખસેડવામાં આવ્યો છે.

અકસ્માત સર્જાયા બાદ ઘટનાસ્થળે હાજર રોષે ભરાયેલા લોકોએ ભાગવાનો પ્રયાસ કરી રહેલા કારચાલકને રંગેહાથ પકડીને પોલીસને સોંપી દીધો હતો. પોલીસ તપાસમાં સામે આવ્યું છે કે આરોપી રાજકોટ જિલ્લાના ઉપલેટા તાલુકાના રાજપરા ગામનો વતની એભા ચાવડા છે, જે અકસ્માત સમયે દારૂના નશામાં સંપૂર્ણપણે ચૂર હતો. પોલીસે નશાખોર આરોપી સામે ગુનો નોંધીને ધરપકડ કરી લીધી છે અને હવે વૃદ્ધાના મોત બાદ કેસમાં વધુ ગંભીર કલમો ઉમેરી આગળની કાયદેસરની તપાસ તેજ કરી છે.