જામનગરના પ્રદર્શન ગ્રાઉન્ડમાં યોજાશે ‘ઇકો-ફ્રેન્ડલી રાવણદહન'
નાનકપુરીથી નીકળશે શોભાયાત્રાઃ સિંધી સમાજ દ્વારા ૭ દાયકા જૂની પરંપરા
(મુકુંદ બદીયાની દ્વારા) જામનગરઃ તા.૧૯,અસત્ય પર સત્યના વિજયના પ્રતીક સમાન પવિત્ર વિજયાદશમી પર્વ નિમિત્તે જામનગરમાં સિંધી સમાજ દ્વારા દર વર્ષની જેમ આ વર્ષે પણ પરંપરાગત ભવ્ય ‘રાવણદહન' કાર્યક્રમનું આયોજન કરવામાં આવ્યું છે. છેલ્લા સાત દાયકાથી પણ વધુ સમયથી ચાલી આવતી આ ઐતિહાસિક પરંપરાને જાળવી રાખવા માટે સમાજના સ્વયંસેવકો છેલ્લા એક મહિનાથી તૈયારીઓ કરી રહ્યા છે.
આ આયોજનની મુખ્ય વિશેષતા પર્યાવરણ પ્રત્યેની જાગરૂકતા છે. પ્રદૂષણ અટકાવવાના ભાગરૂપે પૂતળાં બનાવવામાં લોખંડ, પ્લાસ્ટિક કે કોઈપણ હાનિકારક રસાયણોનો સહેજ પણ ઉપયોગ કરવામાં આવ્યો નથી. તમામ પૂતળાં માત્ર વાંસ, લાકડાં, કાગળ, ગોણ અને સૂતળી જેવી કુદરતી તેમજ પર્યાવરણને અનુકૂળ સામગ્રીમાંથી જ તૈયાર કરાયા છે.
વિજયાદશમીના દિવસે નાનકપુરી ખાતેથી સુશોભિત શોભાયાત્રા પ્રસ્થાન કરશે. આ યાત્રા શહેરના મુખ્ય માર્ગો જેવા કે હવાઈ ચોક, સેન્ટ્રલ બેંક, બર્ધન ચોક, ચાંદી બજાર, લીમડા લેન અને ક્રિકેટ ગ્રાઉન્ડ થઈને પ્રદર્શન ગ્રાઉન્ડ ખાતે પહોંચશે. શોભાયાત્રામાં રામાયણ આધારિત જીવંત પાત્રોની પ્રસ્તુતિ નગરજનો માટે મુખ્ય આકર્ષણ રહેશે. :
પ્રદર્શન ગ્રાઉન્ડ ખાતે શોભાયાત્રાના આગમન બાદ ભગવાન શ્રીરામ અને રાવણ વચ્ચેના યુદ્ધનું જીવંત મંચન રજૂ કરાશે. વિજયઘોષ સાથે ૩૫ ફૂટ ઊંચા રાવણ તેમજ ૨૫-૨૫ ફૂટ ઊંચા મેઘનાદ અને કુંભકર્ણના વિશાળ પૂતળાંઓનું દહન કરવામાં આવશે.
હજારોની સંખ્યામાં ઉપસ્થિત રહેતી જનમેદનીને ધ્યાને રાખીને દર્શકો માટે બ્લોક વાઇઝ વ્યવસ્થા ગોઠવવામાં આવી છે. સ્થાનિક પોલીસ અને વહીવટી તંત્રના સંકલનથી સુરક્ષા અને ટ્રાફિક વ્યવસ્થા સુનિﾍતિ કરવામાં આવી છે.
સિંધી સમાજ દ્વારા આ ગૌરવપૂર્ણ પરંપરાગત ઉત્સવને નિહાળવા સમસ્ત જામનગરવાસીઓને સહપરિવાર ઉપસ્થિત રહેવા હાર્દિક નિમંત્રણ પાઠવવામાં આવ્યું છે.
(1:21 PM IST)
છેલ્લા 8 દિવસમાં સૌથી લોકપ્રિય 
