(વિનોદ ગાલા દ્વારા)ભુજ તા.૧૫ : કચ્છના મુન્દ્રા પોર્ટ ઉપર અમદાવાદ નાર્કોટિક્સ સેલે દરોડો પાડીને કરોડો રૂપિયાનો ડ્રગ્સનો જથ્થો સીઝ કર્યો હોવાનું જાણવા મળી રહ્યું છે. પ્રાથમિક માહિતી મુજબ નાર્કોટિક્સ ટીમ દ્વારા મુન્દ્રા પોર્ટ કસ્ટમની એસઆઈઆઈબી ટીમ સાથે મળી ચોક્કસ કન્ટેનરને ઝડપી ટ્રાન્સવર્લ્ડ સીએસએફ માં તેની તપાસ હાથ ધરી હતી. વિદેશથી વુલ (ઉન) મંગાવાયેલા આ કન્ટેનરમાં ૧૪૦ કિલો જેટલું ડ્રગ્સ મળી આવ્યું હતું. આ ડ્રગ્સના જથ્થાની કિંમત કરોડોમાં હોવાની શંકા સાથે ડ્રગ્સ કયુ છે તેની તપાસ હાથ ધરાઈ છે. વુલ આયાત કરનાર પાર્ટી સ્થાનિકની હોવાની ચર્ચા વચ્ચે આયાતકાર તેમ જ ક્લિયરિંગ ફોરવર્ડિંગ એજન્ટની પણ તપાસ હાથ ધરાઈ છે. જોકે, વાયા ગુજરાત થઈને દેશમાં ડ્રગ્સ ઘુસાડવા માંગતા દેશદ્રોહી ગદ્દારોના નેટવર્કને ભેદવા માટે કેન્દ્ર સરકારની સુરક્ષા એજન્સીઓ દ્વારા સયુંક્ત તપાસ કરાય તો મોટું રેકેટ ખૂલે. હાલ તુરત આ દરોડા અંગે વધુ માહિતી મેળવાઈ રહી છે.