(વિનોદ ગાલા દ્વારા) ભુજ તા.૬ :  કચ્છ જિલ્લામાં ઉદ્યોગ અને શિક્ષણ ક્ષેત્રે સંશોધન તથા પ્રાદેશિક વિકાસને એક નવી ઊંચાઈ પર લઈ જવા માટે તારીખ ૦૪ જૂન, ૨૦૨૬ના રોજ ક્રાંતિગુરુ શ્યામજી કૃષ્ણ વર્મા કચ્છ યુનિવર્સિટી (KSKVKU) અને દીનદયાળ પોર્ટ ઓથોરિટી (DPA), કંડલા વચ્ચે એક સીમાચિહ્નરૂપ એમઓયુ (Memorandum of Understanding) પર હસ્તાક્ષર કરવામાં આવ્યા છે. ફેડરેશન ઓફ કચ્છ ઇન્ડસ્ટ્રીઝ એસોસિએશન્સ (FOKIA)ની વિશેષ ઉપસ્થિતિ અને સાક્ષીમાં આ કરાર વિધિવત રીતે સંપન્ન થયો હતો. આ ભાગીદારીનો મુખ્ય ઉદ્દેશ્ય રિસર્ચ એન્ડ ડેવલપમેન્ટ (R&D), શૈક્ષણિક વિકાસ, અર્થ સાયન્સ ઇન્ક્યુબેશન સેન્ટરની સ્થાપના, સ્ટાર્ટઅપ્સને પ્રોત્સાહન, નવીન સંશોધનો (ઇનોવેશન) અને બૌદ્ધિક સંપદા અધિકાર (IPR) ક્ષેત્રે જાગૃતિ વધારવાનો છે.

આ ઐતિહાસિક કરાર પર દીનદયાળ પોર્ટ ઓથોરિટી (DPA)ના ચેરમેન શ્રી સુશીલ કુમાર સિંઘ (IRSME) અને કચ્છ યુનિવર્સિટીના કુલપતિ ડૉ. મોહન પટેલ દ્વારા સત્તાવાર હસ્તાક્ષર કરવામાં આવ્યા હતા. આ ગરિમાપૂર્ણ અવસરે ફોકિયા (FOKIA)ના મેનેજિંગ ડિરેક્ટર શ્રી નિમિષ ફડકે, કચ્છ યુનિવર્સિટીના રજિસ્ટ્રાર ડૉ. અનિલ એચ. ગોર, તેમજ યુનિવર્સિટીના બોર્ડ ઓફ મેનેજમેન્ટ (BoM)ના સદસ્ય શ્રી કિરણભાઈ આહીર ખાસ ઉપસ્થિત રહ્યા હતા. આ ઉપરાંત કચ્છ યુનિવર્સિટી, DPA અને ફોકિયાના અન્ય પદાધિકારીઓ અને અધિકારીઓ પણ આ પ્રસંગે હાજર રહીને કાર્યક્રમને શોભાવ્યો હતો.

આ એમઓયુ અંતર્ગત ભવિષ્યમાં બંને સંસ્થાઓ દ્વારા સંયુક્ત રીતે અનેક મહત્વકાંક્ષી આયામો હાથ ધરવામાં આવશે, જેમાં કચ્છ યુનિવર્સિટી પોતાની વિશિષ્ટ ભૌગોલિક અને વૈજ્ઞાનિક ક્ષમતાઓનો લાભ ઉદ્યોગોને આપશે. આ ભાગીદારી હેઠળ કચ્છ યુનિવર્સિટીના ભૂ-વિજ્ઞાન વિભાગના નિષ્ણાતો દ્વારા કચ્છના મોટા અને નાના રણ તેમજ દરિયાકાંઠાના વિસ્તારોમાં ગ્રાઉન્ડવોટર ઇન્વેસ્ટિગેશન (ભૂગર્ભ જળ સંશોધન અને વ્યવસ્થાપન) માટે પોતાની તકનીકી વિશેષજ્ઞતા પૂરી પાડવામાં આવશે. તેની સાથે જ દરિયાકાંઠાના વિસ્તારોમાં પર્યાવરણીય અને ભૌગોલિક જોખમો સામે 'કોસ્ટલ વલ્નરેબિલિટી મેપિંગ' કરવામાં આવશે તેમજ તેનાથી બચવા માટેના નુકસાન ન્યૂનીકરણના ઉપાયો અને યોગ્ય સૂચનો (Mitigation Measures) આપવામાં આવશે. વધુમાં, કચ્છના રણ વિસ્તારમાં છુપાયેલા ઐતિહાસિક અને વૈજ્ઞાનિક વારસાને વૈજ્ઞાનિક ઢબે ઉજાગર કરવા માટે દીનદયાળ પોર્ટ ઓથોરિટી (DPA) દ્વારા જિયો-આર્કિયોલોજિકલ (ભૂ-પુરાતત્વીય) સંશોધન કાર્યો માટે સ્પોન્સરશિપ પૂરી પાડવામાં આવશે.

આ કરારના ભાગરૂપે યુનિવર્સિટી કેમ્પસ ખાતે DPA પ્રેરિત અત્યાધુનિક 'અર્થ સાયન્સ ઇન્ક્યુબેશન સેન્ટર' સ્થાપવામાં આવશે, જેમાં ભાવિ પેઢીમાં જાગૃતિ લાવવા માટે એક ભવ્ય જિયોલોજિકલ મ્યુઝિયમ (ભૂગર્ભ વિજ્ઞાન સંગ્રહાલય) પણ બનાવવામાં આવશે. આ કેન્દ્ર દુર્લભ ખનિજો (Rare Earth Elements), પુનઃપ્રાપ્ય ઊર્જા, હાઇડ્રોકાર્બન અને કુદરતી આપત્તિ વ્યવસ્થાપન જેવા વિષયો પર રિસર્ચ અને કન્સલ્ટન્સી સેવાઓ આપશે.

ઉપરાંત, કચ્છના અંતરિયાળ અને ગ્રામીણ વિસ્તારોના વિદ્યાર્થીઓ, ખાસ કરીને દીકરીઓ ઉચ્ચ શિક્ષણથી વંચિત ન રહે તેની ચિંતા કરતાં ગુજરાત સરકારના શિક્ષણમંત્રીશ્રી ત્રિકમભાઈ છાંગાના સહકારથી શરુ થવા જઈ રહેલા અંતરિયાળ વિસ્તારના પાંચ નવા એક્ષ્ટેન્શન સેન્ટર માટે DPAનો સહયોગ મળશે. આ એમ.ઓ.યુ. હેઠળ DPA દ્વારા કચ્છ યુનિવર્સિટીના વિદ્યાર્થીઓ માટે ઇન્ટર્નશિપ, ટ્રેનિંગ અને ડિઝર્ટેશનની ઉત્કૃષ્ટ તકો ઉપલબ્ધ કરાવાશે તથા ઉદ્યોગોની જરૂરિયાત મુજબના કૌશલ્યવર્ધક (Skill-based) અને વોકેશનલ કોર્સો શરૂ કરાશે, જેથી સ્થાનીય સ્તરે રોજગારીની નવી તકોનું સર્જન થશે. ભારત સરકારના Catch the Rain નાં ખ્વાબને ઉજાગર કરતાં યુનીવર્સીટી કેમ્પસમાં સુજલામ સુફલામ પ્રોજેક્ટ દ્વારા બનાવેલ સરોવરની આસપાસ બ્યુટીફીકેશન તેમજ વોકિંગ-ટ્રેક તથા બાળકો માટેના રમતના સાધનો પુરા પાડવા માટેનો પણ સહયોગ મળી રહેશે.