મોરબી :  મોરબીના વાવડી રોડ વિસ્તારમાં છેલ્લા બે મહિનાથી પીવાના પાણીની ગંભીર સમસ્યાથી પરેશાન થયેલા રહીશોએ આજે વિફરીને પંચાસર ચોકડી ખાતે ચક્કાજામ કરી દીધો હતો. પીવાના પાણીના ટીપે-ટીપે વલખાં મારતા સ્થાનિકોએ રસ્તા પર ઉતરી આવીને તંત્ર સામે ભારે નારાજગી વ્યક્ત કરી હતી, જેના કારણે હાઈવે પર વાહનોની લાંબી કતારો લાગી ગઈ હતી અને ટ્રાફિક વ્યવસ્થા સંપૂર્ણપણે ખોરવાઈ ગઈ હતી.
સ્થાનિક નાગરિકો અને ખાસ કરીને ગૃહિણીઓએ આક્ષેપ કર્યો હતો કે છેલ્લા બે મહિનાથી નિયમિત પાણી પુરવઠો મળતો ન હોવાથી દૈનિક જીવન અને ઘરકામમાં ભારે હાલાકી પડી રહી છે. વારંવાર રજૂઆતો કરવા છતાં નગરપાલિકા કે તંત્ર દ્વારા કોઈ નક્કર ઉકેલ લાવવામાં ન આવતા અંતે લોકોનો ધીરજ ખૂટી ગઈ હતી. લોકોએ ઉગ્ર દેખાવો કરીને માંગ કરી છે કે તાત્કાલિક અસરથી તેમના વિસ્તારમાં પાણીનો નિયમિત પુરવઠો શરૂ કરવામાં આવે.
આ વિરોધ પ્રદર્શનના કારણે વાહનચાલકો અને રાહદારીઓને ભારે મુશ્કેલીનો સામનો કરવો પડ્યો હતો. સ્થિતિની ગંભીરતાને જોતા પોલીસ કાફલો પણ ઘટનાસ્થળે પહોંચી ગયો હતો અને પરિસ્થિતિને કાબૂમાં લેવાના પ્રયાસો હાથ ધર્યા હતા. રહીશોએ સ્પષ્ટ ચેતવણી આપી છે કે જો આવનારા દિવસોમાં પાણીની સમસ્યાનો કાયમી ઉકેલ નહીં આવે, તો આગામી સમયમાં આનાથી પણ વધુ ઉગ્ર આંદોલન કરવામાં આવશે.
પીવાના પાણીની આ સમસ્યા અહીં નવી નથી, પરંતુ છેલ્લા ઘણા સમયથી પાણીનું તંત્ર કથળતું ગયું છે, જેનો ભોગ હાલમાં સામાન્ય પ્રજા બની રહી છે. હવે સ્થાનિકોની આ માંગણી બાદ તંત્ર કઈ રીતે પ્રતિક્રિયા આપે છે અને પાણીની સુવિધા પુનઃસ્થાપિત કરવા માટે કેવા પગલાં લે છે તે જોવું રહ્યું. જ્યાં સુધી પાણીની સમસ્યા હલ નહીં થાય ત્યાં સુધી જનઆક્રોશ યથાવત રહેવાની શક્યતા છે.