રાજકોટના મવડી વિસ્‍તારમાં રસ્‍તા ઉપર જોરદાર ઝાકળવર્ષા થયેલ નજરે પડે છે.

રાજકોટ તા.૨૮: રાજકોટ સહિત સમગ્ર સૌરાષ્‍ટ્ર અને કચ્‍છ પંથકમાં આજે વહેલી સવારે સતત બીજા દિવસે જોરદાર ઝાકળ વર્ષા અને ગાઢ ધુમ્‍મસ જોવા મળ્‍યું હતું. છેલ્લા બે દિવસથી વહેલી સવારે ૫ થી ૮ વાગ્‍યા સુધી વિઝિબિલિટી માત્ર ૫૦ થી ૧૦૦ મીટર જેટલી રહેતા વાહન ચાલકોને ભારે હાલાકીનો સામનો કરવો પડ્‍યો હતો.

રાજકોટના ગોંડલ રોડ, કાલાવડ રોડ, મોરબી રોડ અને રાજકોટ-અમદાવાદ નેશનલ હાઈવે પર સવારે ધુમ્‍મસને કારણે વાહન ચાલકોને હેડલાઈટ ચાલુ રાખીને ધીમી ગતિએ વાહન ચલાવવાની ફરજ પડી હતી. અનેક જગ્‍યાએ ટ્રક અને બસ ચાલકોએ રસ્‍તાની સાઈડમાં વાહનો ઉભા રાખી દીધા હતા.

હવામાન વિભાગના જણાવ્‍યા અનુસાર, ઉત્તર-પૂર્વના પવનો ફૂંકાવા અને લઘુત્તમ તાપમાનમાં ૩ થી ૪ ડિગ્રીનો ઘટાડો થવાને કારણે આ ઝાકળ વર્ષા થઈ રહી છે.  ખેડૂતો માટે આ ઝાકળ રવિ પાક માટે ફાયદાકારક માનવામાં આવે છે, પરંતુ વધુ પડતું ધુમ્‍મસ શાકભાજીના પાકને નુકસાન પણ કરી શકે છે.

ટ્રાફિક પોલીસે વાહન ચાલકોને વહેલી સવારે પૂરતી સાવચેતી રાખવા, હેડલાઈટ અને ફોગ લાઈટનો ઉપયોગ કરવા અને ઓવર સ્‍પીડ ટાળવા અપીલ કરી છે. આગામી બે-ત્રણ દિવસ સુધી આવું જ વાતાવરણ રહેવાની હવામાન વિભાગે આગાહી કરી છે.

જામનગર

(મુકુંદ બદિયાણી દ્વારા) જામનગરઃ બાજરા સંશોધન કેન્‍દ્ર જામનગર તરફથી મળેલ તાપમાનની વિગત જોઇએ તો લઘુતમ તાપમાન ૨૪ ડિગ્રી, મહતમ ૩૪, ભેજનું પ્રમાણ ૮૪ ટકા, પવનની ઝડપ ૯.૨ કિ.મી. પ્રતિ કલાક રહી હતી.