અમરેલીના ચતુરી ગામે સિંહણ દ્વારા બાળક પર હુમલો કરવામાં આવતા સમગ્ર પંથકમાં ભયનો માહોલ છવાઈ ગયો છે. પ્રાપ્ત વિગતો અનુસાર, એક ૫ વર્ષનું બાળક તેના દાદા સાથે જઈ રહ્યું હતું, તે દરમિયાન અચાનક સિંહણે હુમલો કરીને બાળકને ખેંચી ગઈ હતી. આ હૃદયદ્રાવક ઘટના બાદ વન વિભાગને જાણ કરવામાં આવતા વિભાગ દ્વારા બાળકને શોધવા માટે તાત્કાલિક શોધખોળ અભિયાન શરૂ કરવામાં આવ્યું છે. છેલ્લા એક મહિનામાં સિંહ દ્વારા માનવ પર હુમલાની આ ત્રીજી ઘટના બનતા સ્થાનિક ગ્રામજનોમાં સિંહણ સામે ભારે ફફડાટ અને રોષ જોવા મળી રહ્યો છે. વારંવાર બની રહેલી આવી ઘટનાઓને પગલે વન વિભાગની કામગીરી સામે પણ સવાલો ઉઠી રહ્યા છે.