(દિપક કનૈયા દ્વારા)બાબરા:  અમરેલી જિલ્લાના બાબરા શહેરના અમરાપરા વિસ્તારમાં થયેલી ઘરફોડ ચોરીના અનડિટેક્ટ ગુનાનો ભેદ ઉકેલવામાં બાબરા પોલીસની સર્વેલન્સ ટીમને મોટી સફળતા મળી છે. ટેકનિકલ સર્વેલન્સ અને હ્યુમન સોર્સની મદદથી મહિનાઓ સુધી શંકાસ્પદ વ્યક્તિઓની ગતિવિધિઓ પર ખાનગી રીતે નજર રાખ્યા બાદ પોલીસે બે આરોપીઓને ઝડપી પાડ્યા છે. પોલીસ દ્વારા ચોરીમાં ગયેલી રોકડ રકમ, સોનાનો ઢાળિયો અને મોટરસાઇકલ સહિત કુલ રૂ.10,05,000ની કિંમતનો મુદ્દામાલ કબજે કરવામાં આવ્યો છે.
ઉચ્ચ પોલીસ અધિકારીઓની સૂચનાથી હાથ ધરાઈ કાર્યવાહી
ભાવનગર રેન્જના આઈ.જી.પી. શ્રી આર.વી. અસારી સાહેબ દ્વારા રેન્જના જિલ્લાઓમાં મિલકત સંબંધી ચોરીના ગુનાઓમાં આરોપીઓને પકડી પાડી મુદ્દામાલ રિકવર કરવા તથા અનડિટેક્ટ ગુનાઓનો ભેદ ઉકેલવા સૂચના આપવામાં આવી હતી. આ અન્વયે અમરેલી જિલ્લા પોલીસ અધિક્ષક શ્રી સંજય ખરાત સાહેબ દ્વારા જિલ્લામાં મિલકત સંબંધી ગુનાઓ અટકાવવા અને ઘરફોડ ચોરીના ગુનાઓમાં સંડોવાયેલા આરોપીઓને પકડી પાડવા જરૂરી માર્ગદર્શન આપવામાં આવ્યું હતું. તેમજ લાઠી વિભાગના વિભાગીય પોલીસ અધિકારી શ્રી વિસ્મય માનસેતા સાહેબ દ્વારા પણ જરૂરી સૂચનાઓ અને માર્ગદર્શન આપવામાં આવ્યું હતું.
મહિનાઓની મહેનત બાદ બે આરોપીઓ ઝડપાયા
આ સૂચનાઓના અનુસંધાને બાબરા પોલીસ સ્ટેશનના પોલીસ ઇન્સ્પેક્ટર શ્રી એમ.બી. ઔસુરાના સીધા માર્ગદર્શન હેઠળ બાબરા પોલીસની સર્વેલન્સ ટીમે બાબરા પોલીસ સ્ટેશન પાર્ટ-A ગુ.ર.નં. 11193008260157/2025, ભારતીય ન્યાય સંહિતાની કલમ 305(2), 331(3) અને 331(4) મુજબ તા.12/04/2025ના રોજ નોંધાયેલા ઘરફોડ ચોરીના ગુનાની તપાસ હાથ ધરી હતી.
પોલીસ ટીમે ટેકનિકલ સર્વેલન્સ અને હ્યુમન સોર્સની મદદથી શંકાસ્પદ વ્યક્તિઓની ગતિવિધિઓ પર લાંબા સમય સુધી ખાનગી રીતે વોચ રાખી હતી. અંતે તા.23/10/2026ના રોજ બાબરામાં ન્યાયમંદિર પાછળ આવેલા કાચા માર્ગ પરથી બે શખ્સોને ચોરીના મુદ્દામાલ અને રોકડ રકમ સાથે ઝડપી પાડવામાં આવ્યા હતા. આ સાથે લાંબા સમયથી વણઉકેલ રહેલા ઘરફોડ ચોરીના ગુનાનો ભેદ ઉકેલાયો હતો. પોલીસે બંને આરોપીઓ વિરુદ્ધ કાયદેસરની કાર્યવાહી હાથ ધરી છે.
પોલીસે પકડેલા આરોપીઓનાં નામ
1. અભિષેક વિજયભાઈ જાની, ઉંમર વર્ષ 23, રહે. ઘર નં.91, સ્વામિનારાયણ નગર, બાબરા, જિ. અમરેલી.
2. નયનભાઈ સુરેશભાઈ સાકરીયા, ઉંમર વર્ષ 31, રહે. મેઈન બજાર, રામજી મંદિર પાસે, બાબરા, જિ. અમરેલી.
કબજે કરેલો મુદ્દામાલ
1. રોકડ રકમ રૂ.3,00,000.
2. એક સોનાનો ઢાળિયો, કિંમત રૂ.6,85,000.
3. હીરો હોન્ડા સ્પ્લેન્ડર પ્લસ મોટરસાઇકલ, કિંમત રૂ.20,000.
આમ, પોલીસે કુલ રૂ.10,05,000ની કિંમતનો મુદ્દામાલ કબજે કર્યો છે.
બાબરા પોલીસની ટીમે બજાવી સરાહનીય કામગીરી
આ સફળ કામગીરીમાં બાબરા પોલીસ સ્ટેશનના પોલીસ ઇન્સ્પેક્ટર શ્રી એમ.બી. ઔસુરા, એ.એસ.આઈ. કિરણભાઈ સોલંકી, હેડ કોન્સ્ટેબલ રાજભા વાઘેલા, હેડ કોન્સ્ટેબલ રમેશભાઈ કોતર, પોલીસ કોન્સ્ટેબલ ગોકળભાઈ રાતડિયા, પોલીસ કોન્સ્ટેબલ વિજયભાઈ ચારડિયા અને પોલીસ કોન્સ્ટેબલ ભારતભાઈ મકવાણાએ કામગીરી કરી હતી.
બાબરા પોલીસની સર્વેલન્સ ટીમે ટેકનિકલ સર્વેલન્સ, બાતમીદારો અને સતત દેખરેખના આધારે ઘરફોડ ચોરીના ગુનાનો ભેદ ઉકેલી મુદ્દામાલ રિકવર કરતાં પોલીસની કામગીરીની સરાહના થઈ રહી છે.