(મેઘના વિપુલ હિરાણી દ્વારા) ભાવનગર, તા.૨૨: સિહોર તાલુકાનાં આંબલા ગામના યુવાનો ઈશ્વરિયા ગામના ઈશ્વરપુર વિસ્‍તારમાં ખાણમાં ભરાયેલા પાણીમાં ન્‍હાવા માટે ગયાં હતાં. સોમવારે બપોરે આ યુવાનો ન્‍હાવા ગયાં બાદ ઉપર ભેખડ પરથી કૂદકો મારતાં હરેશભાઈ ડાભી નામના ૩૫ વર્ષીય પરણિત યુવક બહાર આવી ન શકતાં ડૂબી જવા પામેલ.

આ ઘટનાની જાણ થતાં મામલતદાર  સતીશભાઈ જાબુચા અને અન્‍ય કર્મચારીઓ અગ્રણીઓ દોડી ગયાં હતાં. આ સાથે સિહોર અને ભાવનગરથી બચાવ ટુકડીઓ પણ ઘટના સ્‍થળે પહોંચેલ પરંતુ સાંજ સુધી ગુમ થયેલ યુવકની ભાળ મળી ન હતી. બીજા દિવસે આજે ભાવનગર મહાનગરપાલિકા અગ્નિશમન અને આપાતકાલીન બચાવ ટુકડી દ્વારા સંબંધિત ઉપકરણો અને નાવ સાથે સવારથી શોધખોળ માટે જહેમત ઉઠાવાઈ હતી, જે દરમિયાન આગલા દિવસે ન્‍હાવા પડેલાં આ યુવકનો મળતદેહ બે દિવસની જહેમત બાદ હાથ આવ્‍યો હતો, જેને આગળની કાર્યવાહી માટે સરકારી દવાખાને ખસેડવામાં આવેલ હતો.