મુકુંદ બદીયાણી દ્વારા, જામનગર:જામનગર શહેરમાં કાયદો અને વ્યવસ્થાની સ્થિતિ સામે સવાલ ઊભા કરતી એક ચોંકાવનારી ઘટના સામે આવી છે. શહેરના નવી વાસ વિસ્તારમાં માત્ર 20 રૂપિયાની નજીવી રકમની માંગણી પૂરી ન થતા એક શખ્સે ફ્રૂટ વિક્રેતા પર છરી વડે જીવલેણ હુમલો કરી જાનથી મારી નાખવાનો પ્રયાસ કર્યો છે. આ હિંસક હુમલાને પગલે સમગ્ર પંથકમાં ભારે ચકચાર જાગી છે.

ઘટનાની વિગત અને હુમલાનું કારણ

મળતી માહિતી મુજબ, નવી વાસ વિસ્તારમાં રહેતા અને વર્ષોથી ફૂટપાથ પર રેકડી ચલાવી ગુજરાન ચલાવતા રમેશભાઈ નારણભાઈ દતાણી વહેલી સવારે શાલીમાર પાન પાસે એક મકાનના ઓટલા પર સૂતા હતા. આ દરમિયાન ઈમ્તિયાઝ ઉર્ફે ભોયો યુનુસભાઈ ગામેતી નામનો શખ્સ ત્યાં આવ્યો હતો અને રમેશભાઈ પાસે બળજબરીથી 20 રૂપિયાની માંગણી કરી હતી. રમેશભાઈએ પૈસા આપવાનો ઈન્કાર કરતા આરોપી ઉશ્કેરાઈ ગયો હતો અને પોતાની પાસે રહેલી છરી વડે રમેશભાઈના પેટના ભાગે એક પછી એક ત્રણ ઘા ઝીંકી દીધા હતા.

હોસ્પિટલમાં સારવાર અને પોલીસ કાર્યવાહી

લોહીલુહાણ હાલતમાં રમેશભાઈને તાત્કાલિક સારવાર માટે જામનગરની જી.જી. હોસ્પિટલમાં ખસેડવામાં આવ્યા હતા. તબીબોના જણાવ્યા અનુસાર, તેમની હાલત અત્યંત ગંભીર છે અને તેઓ હાલ બેશુદ્ધ અવસ્થામાં મૃત્યુ સામે જંગ લડી રહ્યા છે. આ બનાવ અંગે ઇજાગ્રસ્તના ભત્રીજા સંદીપ મનસુખભાઈ દતાણી (રહે. પોરબંદર) એ ફરિયાદ નોંધાવી છે.

ઘટનાની ગંભીરતાને ધ્યાને લઈ દરબાર ગઢ પોલીસ ચોકીના પી.એસ.આઈ. વી.આર. ગામેતી સહિતનો પોલીસ કાફલો તપાસમાં જોડાયો છે. પોલીસે આરોપી ઈમ્તિયાઝ સામે હત્યાના પ્રયાસ (કલમ 307) હેઠળ ગુનો નોંધી તેની શોધખોળ હાથ ધરી છે. માત્ર સામાન્ય રકમ માટે થયેલા આ ખૂની હુમલાએ સ્થાનિક રહેવાસીઓમાં ભય અને રોષનો માહોલ પેદા કર્યો છે.