જામનગર : જામનગર શહેરમાં કાયદો અને વ્યવસ્થાના ધજાગરા ઉડાવતી એક અત્યંત કરુણ અને આઘાતજનક ઘટના સામે આવી છે. ખેતીવાડી વિસ્તારમાં ગત મોડી સાંજે પોતાના પરિવાર માટે છાશ લેવા નીકળેલા માત્ર 20 વર્ષીય કરણ વાઘેલા નામના યુવકની અસામાજિક તત્વો દ્વારા જાહેરમાં નિર્મમ હત્યા કરી દેવામાં આવી છે. આ ઘટનાએ સમગ્ર જામનગરને હચમચાવી દીધું છે અને સ્થાનિકોમાં પોલીસ તંત્ર સામે ભારે રોષની લાગણી જોવા મળી રહી છે.
સામાન્ય તકરાર બની જીવલેણ
પ્રાપ્ત અહેવાલો અનુસાર, મૃતક કરણ વાઘેલા જ્યારે ખેતીવાડી વિસ્તારમાં છાસ લેવા માટે ગયો હતો, ત્યારે નશામાં ધૂત કેટલાક આવારા તત્વો ત્યાં પહોંચ્યા હતા. આ શખ્સોએ કરણ સાથે 'વાહન અથડાઈ ગયું' હોવાનું બહાનું કાઢીને ઝઘડો શરૂ કર્યો હતો. વાત એટલી વણસી ગઈ કે આરોપીઓએ ઉશ્કેરાઈને કરણ પર છરી વડે ઘાતકી હુમલો કરી દીધો હતો. આરોપીઓએ કરણના પેટ અને પડખાના ભાગે આડેધડ છરીના 4 થી 5 ઘા ઝીંકી દીધા હતા, જે એટલા ગંભીર હતા કે કરણના આંતરડા બહાર આવી ગયા હતા.
સીસીટીવીમાં કેદ થઈ લોહીયાળ ઘટના
આ સમગ્ર હૃદયદ્રાવક દ્રશ્ય નજીકમાં લાગેલા સીસીટીવી કેમેરામાં સ્પષ્ટપણે કેદ થયું છે. ઘટના સમયે આસપાસ હાજર લોકોએ કરણને બચાવવાનો નિષ્ફળ પ્રયાસ કર્યો હતો, પરંતુ હથિયારધારી આરોપીઓએ લોકોને ડરાવી-ધમકાવી દૂર કરી દીધા હતા અને હત્યાને અંજામ આપી સ્થળ પરથી ફરાર થઈ ગયા હતા.
પરિવારની માગ: ન્યાય નહીં તો મૃતદેહ સ્વીકારવાનો ઇનકાર
યુવકના અચાનક મોતથી તેના પરિવારજનો પર આભ તૂટી પડ્યું છે. આક્રોશમાં આવેલા પરિજનોએ હોસ્પિટલમાં મૃતદેહ સ્વીકારવાનો સ્પષ્ટ ઇનકાર કરી દીધો છે. તેમની એક જ માંગ છે કે, જ્યાં સુધી આ ઘાતકી હત્યા કરનારા તમામ આરોપીઓની ધરપકડ કરીને તેમને કડકમાં કડક સજા કરવામાં નહીં આવે, ત્યાં સુધી તેઓ કરણના અંતિમ સંસ્કાર કરશે નહીં. હાલ પોલીસ દ્વારા સીસીટીવી ફૂટેજના આધારે આરોપીઓને ઝડપી લેવા માટે ચક્રો ગતિમાન કરવામાં આવ્યા છે.