ભુજ : કચ્છ જિલ્લામાં હાલ આર્દ્રા નક્ષત્ર ચાલી રહ્યું છે અને તેની અસર વર્તાઈ રહી છે. જિલ્લામાં અસહ્ય બફારો અને ઉકળાટથી લોકો ત્રાહિમામ પોકારી ઉઠ્યા છે. ભુજમાં શનિવારે મહત્તમ તાપમાન 38 ડિગ્રી નોંધાયું હતું, જ્યારે ભેજનું પ્રમાણ 85% થી વધુ રહેતા ગરમી વધુ અકળાવનારી બની છે.

આ વચ્ચે શનિવારે બપોર બાદ મુંદ્રા અને નખત્રાણા પંથકના કેટલાક વિસ્તારોમાં વાતાવરણમાં પલટો આવ્યો હતો અને વરસાદી ઝાપટાં પડ્યા હતા. મુંદ્રા તાલુકાના બારોઈ, ભદ્રેશ્વર, જરપરા તેમજ નખત્રાણા તાલુકાના નિરોણા, કોટડા (જડોદર) અને દેશલપર વિસ્તારમાં 10 થી 15 મિનિટ સુધી હળવો વરસાદ થયો હતો. આ ઝાપટાંથી વાતાવરણમાં ઠંડક પ્રસરી હતી, પરંતુ બફારામાં કોઈ મોટી રાહત મળી નથી.

હવામાન વિભાગના ભુજ કેન્દ્રના અધિકારી પાર્થ જોશીએ જણાવ્યું કે, "હાલ અરબી સમુદ્રમાં સર્જાયેલી સિસ્ટમને કારણે 2 જુલાઈથી કચ્છ જિલ્લામાં ચોમાસું સક્રિય થશે. 2 થી 5 જુલાઈ દરમિયાન જિલ્લાના મોટાભાગના વિસ્તારોમાં હળવાથી મધ્યમ અને ક્યાંક ભારે વરસાદની શક્યતા છે. ખાસ કરીને માંડવી, મુંદ્રા, અબડાસા અને લખપત પંથકમાં સારા વરસાદની આગાહી છે." 

ખેતીવાડી વિભાગે પણ ખેડૂતોને વરાપ થતાં જ વાવણી શરૂ કરવા માટે તૈયાર રહેવા સૂચના આપી છે.