મોરબી : મોરબીની સબ જેલ જાણે કે ગુનેગારોનો સુરક્ષિત અડ્ડો બની ગઈ હોય તેવો ઘાટ સર્જાઈ રહ્યો છે, કારણ કે જ્યારે પણ જેલની અંદર સરપ્રાઈઝ ચેકિંગ હાથ ધરવામાં આવે છે ત્યારે મોબાઈલ અને પાન-માવા જેવી પ્રતિબંધિત ચીજવસ્તુઓ અછત વગર મળી આવે છે, અને ગઈકાલે રાત્રે પણ ચેકિંગ દરમિયાન સ્માર્ટફોન તેમજ સિમકાર્ડ મળી આવતા જેલ પ્રશાસનની કામગીરી સામે મોટા સવાલો ઉભા થયા છે.

મોરબી સબ જેલમાં સુબેદાર તરીકે ફરજ બજાવતા રાજુભાઈ એન. ઝેઝરીયાએ સીટી એ ડિવીઝન પોલીસ મથકમાં સત્તાવાર ફરિયાદ નોંધાવી છે કે ગત તા. ૧૯ ના રોજ રાત્રીના આઠ વાગ્યે રાત્રી ફરજ પર રહેલા સિપાઈ ભરતભાઈ ખાંભરાનો ફોન આવ્યો હતો કે તાત્કાલિક જેલ ખાતે આવો, જેથી તેઓ તરત જ જેલ પર પહોંચીને સ્ટાફને બોલાવ્યો હતો.

જેલ અધિક્ષક એચ. એ. બાબરિયા સાહેબના હુકમથી સિપાઈ અશ્વિનભાઈ મકવાણા, નારણભાઈ ખટાણા, જેલ સહાયક જયકુમાર જારીયા, અભયસિંહ ભાટિયા અને સાગરભાઈ કાનગડ સહિતના તમામ સ્ટાફે સાથે મળીને સર્કલ નંબર ૨ ખોલીને ઝઘડતી અને તપાસની કામગીરી હાથ ધરી હતી.

આ ઝીણવટભરી ઝડતી દરમિયાન કાચા કામના આરોપી ફારૂક અલ્લારખા ભટીના પેન્ટના નેફામાંથી એક એન્ડ્રોઇડ મોબાઈલ ફોન અને જിയો કંપનીનું સિમકાર્ડ મળી આવ્યું હતું, જેની કિંમત આશરે રૂપિયા ૧૦૦૦ આંકીને જેલની અંદર પ્રતિબંધિત વસ્તુ રાખવા અંગે ગુનો નોંધીને હવે આ ફોન અંદર કેવી રીતે આવ્યો અને કોણે મદદ કરી તે અંગે પોલીસ વધુ તપાસ ચલાવી રહી છે.