(વિનોદ ગાલા દ્વારા)ભુજ તા.૧૯ : અંજાર શહેરમાં લાંબા સમયથી રખડતા ઢોરનો ગંભીર ત્રાસ જોવા મળી રહ્યો છે. તે દરમિયાન રસ્તા પર રખડતા આખલાની ઝપટે આવી જતાં વૃદ્ધ ભરતભાઈ મહાશંકર પંડ્યા ગંભીર રીતે ઘાયલ થયા હતા અને ત્રણ દિવસની સારવાર દરમિયાન તેમણે પોતાનો જીવ ગુમાવ્યો છે. 

આ ઘટનાને પગલે સ્થાનિક રહીશોમાં તંત્ર સામે ભારે આક્રોશ જોવા મળી રહ્યો છે. લોકોનું કહેવું છે કે રખડતા પશુઓની સમસ્યા લાંબા સમયથી માથાનો દુખાવો બનેલી છે. સ્થાનિકો દ્વારા અંજાર નગરપાલિકા પાસે તાત્કાલિક ધોરણે રખડતા ઢોરને પકડવા માટે વિશેષ ઝુંબેશ શરૂ કરવાની માંગ કરવામાં આવી છે. આ ઉપરાંત જોખમી વિસ્તારોની ઓળખ કરી પશુઓને રસ્તા પર છુટા મુકનારા માલિકો સામે કડક કાયદાકીય કાર્યવાહી કરવામાં આવે તેવી લોક માંગ બુલંદ બની છે.