જૂનાગઢ, તા. 17  : જૂનાગઢ મહાનગરપાલિકાના ફાયર વિભાગમાં ડ્રાઈવરની ભરતી પ્રક્રિયામાં મોટા પાયે ગોટાળાના આક્ષેપો થયા છે. ઉમેદવારોએ આરોપ લગાવ્યો છે કે હેવી વાહનના ડ્રાઈવરની જગ્યા માટે હળવા વાહન એટલે કે સ્વિફ્ટ કારથી ડ્રાઈવિંગ ટેસ્ટ લેવામાં આવ્યો હતો. આ મામલે ઉમેદવારોએ આજે મ્યુનિસિપલ કમિશનરને આવેદનપત્ર આપીને સમગ્ર ભરતી પ્રક્રિયાની તપાસની માંગ કરી છે.

જૂનાગઢ મનપા દ્વારા ફાયર વિભાગમાં ડ્રાઈવરની 8 જગ્યાઓ માટે ભરતી બહાર પાડવામાં આવી હતી. જાહેરાત મુજબ ઉમેદવાર પાસે હેવી મોટર વ્હીકલનું લાયસન્સ ફરજિયાત હતું અને ફાયર ટેન્ડર જેવા ભારે વાહનો ચલાવવાનો અનુભવ જરૂરી હતો. ઉમેદવારોનો આક્ષેપ છે કે ગત સપ્તાહે લેવાયેલા પ્રેક્ટિકલ ટેસ્ટમાં ફાયર ટેન્ડર કે અન્ય હેવી વાહનને બદલે મારુતિ સ્વિફ્ટ કારથી ટેસ્ટ લેવામાં આવ્યો હતો. 

ઉમેદવારોએ જણાવ્યું કે ફાયર વિભાગના ડ્રાઈવરને કટોકટીના સમયે 12થી 14 ટન વજનનું ફાયર ટેન્ડર ચલાવવાનું હોય છે. હળવા વાહનથી ટેસ્ટ લેવાથી ઉમેદવારની સાચી ક્ષમતા ચકાસી શકાતી નથી. આ ઉપરાંત ટેસ્ટ દરમિયાન કોઈ વીડિયો રેકોર્ડિંગ પણ કરવામાં આવ્યું ન હતું અને માર્કિંગ સિસ્ટમ અંગે પણ કોઈ સ્પષ્ટતા આપવામાં આવી ન હતી. ઉમેદવારોએ ફાયર વિભાગના અધિકારીઓ પર મનપસંદ લોકોની ભરતી કરવા માટે મનમાની કરવાનો આરોપ લગાવ્યો છે.

વિવાદ વધતા મ્યુનિસિપલ કમિશનરે ભરતી પ્રક્રિયા હાલ પૂરતી સ્થગિત કરી દીધી છે. કમિશનરે જણાવ્યું કે ઉમેદવારોની રજૂઆત મળી છે અને સમગ્ર મામલે તપાસ સમિતિની રચના કરવામાં આવશે. તપાસ રિપોર્ટ આવ્યા બાદ આગળની કાર્યવાહી નક્કી કરવામાં આવશે. ફાયર વિભાગના ચીફ ઓફિસરે જણાવ્યું કે હેવી વાહન ઉપલબ્ધ ન હોવાના કારણે વૈકલ્પિક વ્યવસ્થા તરીકે કારથી ટેસ્ટ લેવાયો હતો, પરંતુ તમામ પ્રક્રિયા નિયમ મુજબ જ થઈ છે.