સાળંગપુર: બોટાદ જિલ્લાના સુપ્રસિદ્ધ યાત્રાધામ સાળંગપુર ખાતે પવિત્ર અધિક જેઠ માસ એટલે કે 'પુરુષોત્તમ માસ' નિમિત્તે ભક્તિ, શ્રદ્ધા અને સમર્પણનો એક અદભુત ત્રિવેણી સંગમ જોવા મળી રહ્યો છે. આજે જેઠ સુદ આઠમ અને રાધાષ્ટમીના પાવન અવસરે, સાળંગપુરધામમાં બિરાજમાન પરમ કૃપાળુ શ્રી કષ્ટભંજનદેવ હનુમાનજી દાદાને એકદમ વિશિષ્ટ અને મનમોહક શણગાર સજાવવામાં આવ્યો હતો. પરમ પૂજ્ય શાસ્ત્રી સ્વામી હરિપ્રકાશદાસજી (અથાણાવાળા)ની દિવ્ય પ્રેરણાથી અને કોઠારી શ્રી વિવેકસાગરદાસજી સ્વામીના સીધા માર્ગદર્શન હેઠળ, આજના પવિત્ર શનિવારે દાદાને શ્વેત (વ્હાઈટ) મોતીના કલાત્મક હંસની થીમ પર આધારિત દિવ્ય વાઘા ધારણ કરાવવામાં આવ્યા હતા, જે જોઈને ભક્તો ભાવવિભોર થઈ ગયા હતા. 
સુરતના કારીગરોની અદ્ભુત કલા અને સિંહાસન પર મોરની નયનરમ્ય થીમ
આજના આ વિશિષ્ટ શણગાર વિશે મંદિરના પૂજારી સ્વામીએ વિગતો આપતા જણાવ્યું હતું કે, દાદાને જે શ્વેત મોતીના કલાત્મક વાઘા ધરાવવામાં આવ્યા છે તે ડાયમંડ સિટી સુરતના કુશળ કારીગરો દ્વારા સતત સાત દિવસની અથાણ મહેનતના અંતે ખૂબ જ આસ્થાપૂર્વક તૈયાર કરવામાં આવ્યા છે. માત્ર વાઘા જ નહીં, પરંતુ દાદાના ભવ્ય સિંહાસનને પણ અસંખ્ય મોતીઓનો ઉપયોગ કરીને અત્યંત નયનરમ્ય 'મોરની થીમ' પર સજાવવામાં આવ્યું હતું. આ અલૌકિક સુંદરતા સાથે દાદાના મુખારવિંદનું તેજ ભક્તોની આંખોને ઠારતું હતું. કષ્ટભંજનદેવ દાદાને આ શ્વેત મોતીના વાઘાની સાથે સિંહાસને વિવિધ પ્રકારની સ્વાદિષ્ટ મીઠાઈઓ અને ફરસાણનો છપ્પનભોગ ધરાવાયો હતો. તદુપરાંત, ઉનાળાની મોસમના ખાસ ફળો એવા મધમીઠી કેરી અને રસદાર જાંબુનો પણ એક વિશેષ ભવ્ય અન્નકૂટ દાદાના ચરણોમાં અર્પણ કરવામાં આવ્યો હતો. 
મંગળા આરતીથી શરૂ થયો ભક્તિનો ઉત્સવ: મારુતિ યજ્ઞથી વાતાવરણ પવિત્ર બન્યું
શનિવાર અને પુરુષોત્તમ માસનો અદભુત સંયોગ હોવાના કારણે આજે વહેલી સવારે ૦૫:૩૦ કલાકે પૂજારી સ્વામી દ્વારા દાદાની મંગળા આરતી ઉતારવામાં આવી હતી. ત્યારબાદ સવારે ૦૭:૦૦ કલાકે કોઠારી વિવેકસાગરદાસજી સ્વામીના હસ્તે દિવ્ય શણગાર આરતી કરવામાં આવી હતી, જેમાં હજારો હરિભક્તોએ શ્રદ્ધાપૂર્વક ભાગ લીધો હતો. 
"પારિવારિક શાંતિ, સુખ-સમૃદ્ધિ અને આધ્યાત્મિક ઉન્નતિ માટે મંદિરના વિશાળ પટાંગણમાં ગત ૧૭ મે થી આગામી ૧૫ જૂન ૨૦૨૬ સુધી એક ભવ્ય શ્રી હનુમાન ચાલીસા યજ્ઞનું સુંદર આયોજન કરવામાં આવ્યું છે."
આ દિવ્ય યજ્ઞ દરરોજ સવારે ૯ થી ૧૨ અને બપોરે ૩ થી સાંજના ૬:૩૦ વાગ્યા સુધી વૈદિક મંત્રોચ્ચાર સાથે ચાલે છે. આજના પવિત્ર શનિવારે મોટી સંખ્યામાં શ્રદ્ધાળુઓએ દાદાના શિખરે પરમ પવિત્ર ધજાઓ ચઢાવી હતી અને દાદાના દર્શન, દિવ્ય આરતી તેમજ મહાપ્રસાદનો લાભ લઈ ધન્યતા અને પરમ શાંતિનો અનુભવ કર્યો હતો.