જૂનાગઢઃ જિલ્લાના ગલીયાવડ ગામમાં લોકોના જીવ જોખમમાં મૂકીને મેડિકલ ડિગ્રી વગર સારવાર આપતા એક બોગસ ડૉક્ટરનો પર્દાફાશ થયો છે. પોલીસ તપાસમાં બહાર આવ્યું છે કે, શરીફ વલીમહમદ સંધાર નામનો આ શખ્સ કોઈપણ માન્ય લાયકાત વગર ગેરકાયદેસર રીતે નકલી દવાખાનું ચલાવી રહ્યો હતો અને નિર્દોષ લોકોના સ્વાસ્થ્ય સાથે ગંભીર ચેડાં કરી રહ્યો હતો.

બાતમીના આધારે પોલીસે દરોડો (Raid) પાડીને આ નકલી ડૉક્ટરની ધરપકડ (Arrest) કરી છે. આ કાર્યવાહી દરમિયાન દવાખાનામાંથી વિવિધ એલોપેથી દવાઓ અને ઇન્જેક્શન સહિત આશરે 9,973 રૂપિયાનો મુદ્દામાલ જપ્ત કરવામાં આવ્યો છે. હાલ પોલીસે આરોપી વિરુદ્ધ ગુનો નોંધી વધુ તપાસ હાથ ધરી છે કે આ શખ્સ કેટલા સમયથી અને કોના પીઠબળથી આ રીતે મેડિકલ પ્રેક્ટિસ કરી રહ્યો હતો.