મોરબી : જન્માષ્ટમીના પાવન અવસરે મોરબી શહેરની ઉત્સવપ્રિય જનતા માટે ખાનગી મેળા સંચાલકો દ્વારા શહેરના કંડલા બાયપાસ, કેનાલ રોડ, પરશુરામ પોટરી ગ્રાઉન્ડ, માળિયા ફાટક ઓવરબ્રિજ પાસે, મહેન્દ્રનગર ચોકડી અને કુબેર ટોકીઝ એમ કુલ છ મુખ્ય સ્થળોએ ભવ્ય લોકમેળાઓનું આયોજન કરવામાં આવ્યું હતું, જ્યાં સાતમ અને આઠમ પર્વ દરમિયાન હજારોની સંખ્યામાં ઉમટેલી જનમેદનીએ હૈયે હૈયું દળાય તેવી ભીડ વચ્ચે ઉત્સાહભેર મેળાની મોજ માણી હતી.

મોરબીના વિવિધ વિસ્તારોમાં ધમધમતા આ મેળાઓમાં ઉત્સાહી નાગરિકોનો ભારે ધસારો જોવા મળ્યો હતો, જ્યાં ખાસ કરીને બાળકો, મહિલાઓ, યુવાનો અને વડીલોએ પરિવાર સાથે પહોંચીને ડ્રેગન, હુડકુ, મોટી ઊંચી ફજેતફાળકી, ટોરા ટોરા અને બ્રેક ડાન્સ જેવી રોમાંચક રાઇડ્સની મજા માણી હતી અને તહેવારના માહોલને રંગેચંગે ઉજવ્યો હતો.

રાઇડ્સના રોમાંચ ઉપરાંત મેળામાં આવેલા વિવિધ ખાણીપીણીના સ્ટોલ્સ પર નગરજનોએ ચટપટી ડીશનો સ્વાદ માણવાની સાથે-સાથે આઇસ ગોલા અને આઈસ્ક્રીમ કેન્ડીની પણ ભરપૂર મજા માણી હતી, જેથી તહેવારનો આનંદ બેગુણો થઈ ગયો હતો અને તમામ વય જૂથના લોકોએ છએય સ્થળોએ યોજાયેલા આ મેળાઓનો ભરપૂર લાભ ઉઠાવ્યો હતો.

મોરબીમાં આ ખાનગી મેળાઓ રવિવાર સુધી કાર્યરત રહેવાના હોવાથી આગામી રવિવારની રજાના દિવસે પણ મોટી સંખ્યામાં નાગરિકો મેળાની મુલાકાત લેશે તેવી સંભાવના છે, જ્યારે તંત્ર દ્વારા મેળાના સ્થળો પર કાયદો અને વ્યવસ્થા જાળવી રાખવા માટે પૂરતી તકેદારી રાખવામાં આવી છે જેથી નાગરિકો સુરક્ષિત વાતાવરણમાં ઉત્સવ ઉજવી શકે.