ધારી : સૌરાષ્ટ્રના અમરેલી જિલ્લાના ધારી તાલુકાના જળજીવડી ગામમાં આઠ વર્ષની ક્રિષ્ના પાટડીયા ઉપર દીપડાએ હુમલો કરતાં ભારે ફફડાટ ફેલાયો છે. ગીર પૂર્વ વનવિભાગ હેઠળ આવતા વિસ્તારમાં બાળકી ઘર નજીક રમતી હતી ત્યારે ઝાડી તરફથી આવેલા દીપડાએ અચાનક તેના પર હુમલો કર્યો હતો. બાળકીએ ચીસો પાડતાં પરિવારજનો અને આસપાસના લોકો દોડી આવ્યા હતા અને હોબાળો થતાં દીપડો બાળકીને છોડીને ભાગી ગયો હતો.

હુમલામાં ક્રિષ્નાને શરીરે ઈજાઓ પહોંચી હતી. પરિવારજનોએ તેને પ્રથમ ધારીના આરોગ્ય કેન્દ્રમાં ખસેડી હતી, જ્યાં પ્રાથમિક સારવાર બાદ વધુ સારવાર માટે અમરેલી સિવિલ હોસ્પિટલ મોકલવામાં આવી હતી.

બનાવની જાણ થતાં દલખાણીયા રેન્જના વનકર્મીઓ ઘટનાસ્થળે દોડી ગયા હતા. વનવિભાગની ટીમે વિસ્તારમાં દીપડાના પગલાં અને હિલચાલ અંગે તપાસ હાથ ધરી છે. હુમલો કરનાર દીપડાને પકડવા જળજીવડી તથા આસપાસના સીમ વિસ્તારમાં પાંજરાં ગોઠવવામાં આવ્યા છે અને કોમ્બિંગ હાથ ધરાયું છે.

ધારી અને આસપાસનો વિસ્તાર ગીરના વન્યજીવોની અવરજવર ધરાવતો હોવાથી ઘટનાથી ગ્રામજનોમાં ચિંતા વધી છે. સ્થાનિકોએ વનવિભાગ સમક્ષ માનવવસ્તી નજીક વન્યપ્રાણીઓની હિલચાલ ઉપર વધુ દેખરેખ રાખવાની માંગ કરી છે.