રાજકોટ જિલ્લાના જેતપુર શહેરના મુખ્ય બસ સ્ટેન્ડમાં અકસ્માત સર્જાયો છે. બસ સ્ટેન્ડના મુખ્ય ગેટ પાસે ઉભેલી એક નિર્દોષ મહિલાને પૂરપાટ ઝડપે વળાંક લઈ રહેલી એસટી (ST) બસે અડફેટે લીધી હતી. એસટી બસના ડ્રાઈવરની ઘોર બેદરકારી અને ગફલતના કારણે આ ગંભીર દુર્ઘટના સર્જાઈ હોવાનું પ્રાથમિક દ્રષ્ટિએ બહાર આવ્યું છે. આ સમગ્ર હૃદયદ્રાવક અકસ્માતની ઘટના બસ સ્ટેન્ડ પરિસરમાં લાગેલા સીસીટીવી (CCTV) કેમેરામાં કેદ થઈ ગઈ છે, જેના ફૂટેજ સામે આવતા લોકો ધ્રૂજી ઉઠ્યા છે.

મૂળ ઉપલેટાના વતની 35 વર્ષીય સુમનબેન મંડલીક જેતપુરમાં રહેતા પોતાના બહેનના ઘરે આવ્યા હતા. તેઓ પોતાની બહેન સાથે જૂનાગઢના પવિત્ર દામોદર કુંડ જવા માટે જેતપુર બસ સ્ટેન્ડ પહોંચ્યા હતા. સુમનબેન બસ સ્ટેન્ડના મુખ્ય ગેટ પાસે ઉભા રહીને જૂનાગઢ તરફ જતી બસની રાહ જોઈ રહ્યા હતા, બરાબર તે જ સમયે જૂનાગઢ-તલોદ રૂટની એસટી બસે વળાંક લેતી વખતે અચાનક તેમને અડફેટે લઈ લીધા હતા. બસના વ્હીલ નીચે આવી જતાં મહિલા ત્યાં જ ઢળી પડી હતી.

આ અકસ્માત એટલો જોરદાર હતો કે સુમનબેનને શરીરના ભાગે ગંભીર અને જીવલેણ ઈજાઓ પહોંચી હતી અને દુર્ઘટના સર્જાતાની સાથે જ બસ સ્ટેન્ડમાં હાજર મુસાફરો અને સ્થાનિક લોકો તાત્કાલિક બચાવ કામગીરી માટે દોડી આવ્યા હતા. લોહીલુહાણ હાલતમાં સુમનબેનને તાત્કાલિક 108 એમ્બ્યુલન્સ મારફતે નજીકની સરકારી હોસ્પિટલમાં સારવાર અર્થે ખસેડવામાં આવ્યા છે, જ્યાં તેમની હાલત નાજુક હોવાનું કહેવાઈ રહ્યું છે. લોકોથી સતત ઉભરાતા બસ સ્ટેન્ડમાં ડ્રાઈવરની આવી ઘોર લાપરવાહી સામે મુસાફરોમાં ભારે રોષ જોવા મળી રહ્યો છે.