જૂનાગઢ:જૂનાગઢ ડિસ્ટ્રિક્ટ જેલની સુરક્ષા વ્યવસ્થાને લઈને અત્યારે મોટો સવાલ ઉભો થયો છે. જેલ જેવી સુરક્ષિત જગ્યાએ કેદીઓએ માત્ર સ્માર્ટફોન જ નહીં, પરંતુ સિમ કાર્ડ પણ મેળવી લીધા હોવાનો ચોંકાવનારો કિસ્સો સામે આવ્યો છે. જેલની બેરેક નંબર-13માં કરવામાં આવેલી આકસ્મિક તપાસ દરમિયાન, TV બોક્સની પાછળ અત્યંત ચતુરાઈથી છુપાવવામાં આવેલો સ્માર્ટફોન અને સિમ કાર્ડ મળી આવતા સુરક્ષા એજન્સીઓ પણ સ્તબ્ધ થઈ ગઈ છે.
તપાસમાં થયો મોટો ખુલાસો:
બાતમીના આધારે જ્યારે જેલના ઉચ્ચ અધિકારીઓએ બેરેક નંબર-13 પર દરોડો પાડ્યો, ત્યારે કેદીઓની હરકતો જોઈને અધિકારીઓ પણ ચોંકી ગયા હતા. જેલના સળિયા પાછળથી બહારની દુનિયા સાથે સીધો સંપર્ક કરવા માટે આ સ્માર્ટફોનનો ઉપયોગ કરવામાં આવતો હોવાની આશંકા સેવાઈ રહી છે. સવાલ એ છે કે, અત્યંત કડક સુરક્ષા અને તપાસ વચ્ચે મોબાઈલ ફોન જેલની અંદર પહોંચ્યો કેવી રીતે?
અંદરખાને મોટા કૌભાંડની આશંકા:
પ્રાથમિક તપાસમાં બહાર આવ્યું છે કે, આ મોબાઈલનો ઉપયોગ કોલ સેન્ટર તરીકે અથવા બહારના લોકો સાથે વાતચીત કરવા માટે કરવામાં આવતો હતો. હવે જેલ સત્તાવાળાઓ એ તપાસ કરી રહ્યા છે કે આ મોબાઈલ કોણે પહોંચાડ્યો અને તેની પાછળ કયા કેદીઓનો હાથ છે. જેલના કોઈ કર્મચારીની મદદ વિના આ પ્રકારની સામગ્રી અંદર પહોંચવી અશક્ય છે, તેથી હવે જેલના સ્ટાફની ભૂમિકા પણ તપાસ હેઠળ છે.