કચ્છ જિલ્લાના વાતાવરણમાં આજે સાંજથી અચાનક પલટો જોવા મળ્યો છે. પશ્ચિમ કચ્છના નલિયા અને અબડાસા વિસ્તારમાં વીજળીના કડાકા-ભડાકા સાથે કમોસમી વરસાદ શરૂ થયો છે. હવામાન વિભાગની આગાહી વચ્ચે વાતાવરણમાં આવેલા આ અચાનક બદલાવને કારણે સમગ્ર પંથકમાં ઠંડક પ્રસરી ગઈ છે, પરંતુ બીજી તરફ ખેતીના પાકને લઈને ખેડૂતોમાં ચિંતાની લહેર જોવા મળી રહી છે.

પશ્ચિમ કચ્છમાં સાંજથી જ આકાશ કાળા ડિબાંગ વાદળોથી ઘેરાવા લાગ્યું હતું. ત્યારબાદ નલિયા શહેર સહિત અબડાસાના ગ્રામ્ય વિસ્તારોમાં તેજ પવન અને વીજળીના ગડગડાટ સાથે મેઘરાજાની એન્ટ્રી થઈ હતી. માર્ચ-એપ્રિલના અંતિમ દિવસોમાં ઉનાળાની ગરમી વચ્ચે પડેલા આ વરસાદને કારણે વાતાવરણમાં પલટો આવ્યો છે. પશ્ચિમ કચ્છના રણ વિસ્તાર અને દરિયાકાંઠાના ગામોમાં પણ પવનની ગતિમાં વધારો થયો છે.