ભાવનગર :સમાજની પ્રગતિ અને રાષ્ટ્રના નિર્માણમાં શિક્ષકોનો ફાળો સર્વોપરી રહ્યો છે. આ ઉમદા ભાવનાને સાર્થક કરતા રોટરી ક્લબ ઓફ ભાવનગર વાયબ્રન્ટ દ્વારા તા. 29 માર્ચના રોજ બેઝિલ પાર્ક હોટલ  ખાતે એક ભવ્ય 'શિક્ષક સન્માન સમારોહ'નું આયોજન કરવામાં આવ્યું હતું. આ કાર્યક્રમનો મુખ્ય હેતુ શિક્ષણ ક્ષેત્રે પાયાનું કાર્ય કરતા અને વિદ્યાર્થીઓના જીવનમાં પરિવર્તન લાવનારા ગુરુજનોની નિષ્ઠા અને સમર્પણને બિરદાવવાનો હતો.

આ સમારોહમાં ભાવનગર જિલ્લાના વિવિધ વિસ્તારોમાંથી ઝીણવટભરી પસંદગી બાદ 15 પ્રતિભાશાળી શિક્ષકોને સન્માનિત કરવામાં આવ્યા હતા. આ શિક્ષકોએ માત્ર પુસ્તકિયું જ્ઞાન જ નહીં, પરંતુ વિદ્યાર્થીઓના ચારિત્ર્ય ઘડતર અને નૈતિક મૂલ્યોના સિંચનમાં અપ્રતિમ યોગદાન આપ્યું છે. સન્માનિત થયેલા દરેક શિક્ષકની કામગીરી અન્ય લોકો માટે પ્રેરણારૂપ બની રહી છે.

કાર્યક્રમના મુખ્ય અતિથિ તરીકે ભાવનગર ના જાણીતા સામાજિક કાર્યકર ડૉ. આશ્વિન પંડ્યા પસ્થિત રહ્યા હતા. તેમણે પોતાના વક્તવ્યમાં જણાવ્યું હતું કે, "શિક્ષક એ સમાજનો એવો સ્તંભ છે જે અંધકારમાંથી પ્રકાશ તરફ જવાનો માર્ગ બતાવે છે." તેમણે રોટરી ક્લબની આ પહેલને આવકારી હતી અને સન્માનિત શિક્ષકોને અભિનંદન પાઠવ્યા હતા. 

આ ભવ્ય કાર્યક્રમને સફળ બનાવવામાં રોટરી ક્લબના હોદ્દેદારોનું મહત્વનું યોગદાન રહ્યું હતું. ક્લબના પ્રમુખ રોટેરિયન નમ્રતા ચઢાના કુશળ માર્ગદર્શન હેઠળ સમગ્ર આયોજન કરવામાં આવ્યું હતું. એક્ઝિક્યુટિવ સેક્રેટરી રોટેરિયન હીના શાહ તેમજ પ્રોજેક્ટ ચેરપર્સન્સ રોટેરિયન અમી શાહ (Rtn. Ami Shah) અને રોટેરિયન કૃષ્ણા શાહ ની રાત-દિવસની મહેનત અને ચોકસાઈપૂર્વકના આયોજનને કારણે કાર્યક્રમ ખૂબ જ વ્યવસ્થિત રીતે સંપન્ન થયો હતો. 

બેઝિલ પાર્ક હોટલનું સભાખંડ રોટરી સભ્યો, આમંત્રિત મહેમાનો અને શિક્ષકોના પરિવારજનોથી ખીચોખીચ ભરાયેલું હતું. જ્યારે દરેક શિક્ષકને મંચ પર સન્માનચિહ્ન અર્પણ કરવામાં આવ્યું, ત્યારે ઉપસ્થિત મેદનીએ હર્ષનાદ સાથે તેમને વધાવી લીધા હતા. આ પ્રસંગ માત્ર એક એવોર્ડ વિતરણ ન બની રહેતા, શિક્ષણના પવિત્ર કાર્યની ઉજવણીનો ઉત્સવ બની ગયો હતો. અંતમાં, આ કાર્યક્રમે સાબિત કર્યું કે દરેક સફળ વ્યક્તિની સફળતાના પાયામાં એક સમર્પિત શિક્ષકનો અમૂલ્ય ફાળો હોય છે.