દ્વારકા: ધર્મધામ દ્વારકામાં હોળી-ધૂળેટી પર્વની ઉજવણીનું એક અનેરું મહાત્મ્ય છે. આવતીકાલ ૩ માર્ચ, મંગળવારના રોજ દ્વારકાધીશના જગત મંદિરમાં ભવ્યાતિભવ્ય 'ફૂલડોલ ઉત્સવ' ઉજવાશે. આ ઉત્સવમાં સહભાગી થવા માટે દેશ-વિદેશના ખૂણેખૂણેથી હરિભક્તો અને પદયાત્રિકોનો અવિરત પ્રવાહ દ્વારકા નગરીમાં ઉમટી પડ્યો છે. દ્વારકાની શેરીઓમાં અત્યારે 'હાથી ઘોડા પાલખી, જય કનૈયા લાલ કી' ના નાદ સાથે ભક્તિમય વાતાવરણ જોવા મળી રહ્યું છે.
આજે સાંજે ભવ્ય હોલિકા દહન
આજે ૨ માર્ચના રોજ દ્વારકામાં પરંપરાગત રીતે હોળી પ્રાગટ્ય કરવામાં આવશે. સૌ પ્રથમ ગોમતી ઘાટ પાસે પવિત્ર અગ્નિ પ્રગટાવવામાં આવશે, ત્યારબાદ તે જ અગ્નિથી મંદિર ચોક, હોળી ચોક અને માર્કેટ ચોક સહિતના સ્થળોએ હોલિકા દહન થશે. હજારો શ્રદ્ધાળુઓ ગોમતી નદીમાં સ્નાન કરી પૂણ્યનું ભાથું બાંધશે. જગત મંદિર પરિસરમાં અત્યારે ડીજેના તાલે પદયાત્રિકો અને ભક્તો રાસ-ગરબાની રમઝટ બોલાવી રહ્યા છે.
ફૂલડોલ ઉત્સવનું સમયપત્રક અને વિશેષતા
જગત મંદિરના પૂજારીના જણાવ્યા મુજબ, ૩ માર્ચના રોજ ફૂલડોલ ઉત્સવની ઉજવણી નીચે મુજબ થશે:
•    બપોરે ૧:૪૫ વાગ્યે: ઠાકોરજીને ધાણી, દાળિયા અને સૂકામેવાનો મહાભોગ ધરાવાશે.
•    બાલસ્વરૂપના દર્શન: ભગવાનના બાળ સ્વરૂપને ઝુલામાં બિરાજમાન કરી ભક્તો માટે દર્શન ખુલ્લા મૂકાશે.
•    મહાઆરતી અને ધૂળેટી: શંખનાદ અને ઢોલ-નગારાના ગુંજારવ વચ્ચે ઠાકોરજીની મહાઆરતી થશે. આ સમયે ચાંદીની પિચકારીમાં કેસુડો અને કેસરનું જળ ભરી ઠાકોરજી સંગ ધૂળેટી રમાશે.
•    પ્રસાદીનો રંગ: ભગવાનના અંગ પર પધરાવવામાં આવેલ અબીલ-ગુલાલ ભક્તો પર ઉડાડવામાં આવશે, જેને ગ્રહણ કરવા ભક્તો આતુર હોય છે.
પદયાત્રિકોની અટલ આસ્થા
રાજ્યના ખૂણેખૂણેથી હજારો પદયાત્રિકો ધગધગતા તડકા અને ઠંડીની પરવા કર્યા વગર હાથમાં ધજા લઈને દ્વારકા પહોંચી રહ્યા છે. રસ્તામાં સેવાભાવી સંસ્થાઓ દ્વારા તેમના માટે ભોજન અને આરામની વ્યવસ્થા કરવામાં આવી છે. પદયાત્રિકોના મતે, કાળિયા ઠાકોરના દર્શનની એક ઝલક મેળવવા માટેની તેમની આ આસ્થા તમામ થાકને દૂર કરી દે છે.
બપોરે ૨ થી ૩ વાગ્યા સુધી જગત મંદિરમાં અબીલ-ગુલાલની છોળો વચ્ચે પરંપરાગત ફૂલડોલ ઉત્સવ મનાવવામાં આવશે. જે ભક્તો દ્વારકા નથી પહોંચી શક્યા, તેઓ ઓનલાઈન માધ્યમથી આ દિવ્ય દર્શનનો લાભ લેશે.