(જયેશ ભટ્ટાસણા દ્વારા) ટંકારા તા. ર૮ :..  ટંકારા તાલુકાના લતીપર હાઈવે ઉપર સાવડી ગામ નજીક એક અજીબોગરીબ ચોરીની ઘટના સામે આવી છે. તસ્‍કરોએ થાંભલા ઉપર ચાલુ (લાઈવ) હેવી વિજળીના તારોને કાપીને ઉઠાવી લીધા છે. આ ઘટનાથી વિસ્‍તારમાં વીજ પુરવઠો અસરગ્રસ્‍ત થયો હોવાની શકયતા છે અને સ્‍થાનિક લોકોમાં આﾍર્ય તેમજ ચિંતા વ્‍યાપી છે.

મળતી વિગતો અનુસાર, તસ્‍કરોએ રાત્રે અથવા અંધારામાં આ કામગીરી અંજામ આપી હોવાનું અનુમાન છે. ચાલુ વિજળીના તારોને કાપવાની આ ઘટના ખૂબ જ જોખમી છે, કારણ કે તેમાં વીજળીના શોકથી જાનહાનિનું પણ જોખમ રહેલું છે. આવી ચોરીઓમાં  તારોનું મૂલ્‍ય વધુ હોવાથી તસ્‍કરો તેને લક્ષ્ય બનાવે છે.

ઘટનાની જાણ થતાં જ પસ્‍ચિમ ગુજરાત વિજ કંપની લિમિટેડ (પીજીવીસીએલ)નું તંત્ર તાબડતોબ ઘટનાસ્‍થળે પહોંચ્‍યું હતું. અધિકારીઓએ સ્‍થળનું નિરીક્ષણ કર્યું અને તારોની ચોરીની પુષ્ટિ કરી. પીજીવીસીએલ વિભાગે જણાવ્‍યું કે, આ ઘટના અંગે પોલીસમાં ફરિયાદ નોંધાવવાની તજવીજ હાથ ધરી છે.