(વિનોદ ગાલા દ્વારા)ભુજ તા.૨૧ : સમગ્ર કચ્છમાં જાણીતા એવા ભુજના “ધ વિલા” રિસોર્ટમાં બે વર્ષ પહેલા કર્મચારીએ કરેલ આપઘાતના ચકચારી બનાવમાં હવે પોલીસ ફરિયાદ દાખલ થઈ છે. ગત ૨૬/૪/૨૦૨૪ ના સચિન જયપ્રકાશ સૈની નામના ૨૬ વર્ષીય કર્મચારીએ ગળે ફાંસો ખાઈ આપઘાત કરી લીધો હતો. એ સંદર્ભે મૃતક યુવાનના પિતા જયપ્રકાશ સૈનીએ ધ વિલા રિસોર્ટ દ્વારા આપવામાં આવેલ તેમના પુત્રની ફાઇલને તપાસી હતી જેમાં હિન્દી ભાષામાં આ યુવાને લખેલ સુસાઈડ નોટ મળી આવી હતી. જેમાં તેના આપઘાતના કારણમાં હાઉસકીપિંગ એચઓડી કુલદીપ, હ્યુમન રિસોર્સ એચઆર મેનેજર મેડમ સહિત ત્રણ કર્મચારીનો ઉલ્લેખ કરાયો હતો. જે પોલીસે ફોરેન્સિક લેબમાં મોકલતા આ સ્યુસાઇડ નોટ મૃતક યુવાનના અક્ષરમાં જ લખેલી હોવાનું જણાતા પોલીસે ત્રણ આરોપીઓ વિરુદ્ધ ત્રાસ આપી મારવા માટે મજબૂર કર્યાનો ગુનો દાખલ કરી વધુ તપાસ હાથ ધરી છે.