સોમનાથનું પવિત્ર બિલ્વ વનઃ ૭૦૦ બીલીના વૃક્ષો થકી થાય છે શિવની પૂજાઃ રોજ પાંચ હજાર અને શ્રાવણ માસમાં સવા લાખ બિલી પાન ચૂંટવામાં આવે છે
(દિપક કકકડ દ્વારા) વેરાવળ તા ૧૦ :.. શ્રી સોમનાથ ધામમાં શ્રદ્ધા સાથે પર્યાવરણ સંરક્ષણનું અનોખું અને પ્રેરણાદાયક ઉદાહરણ જોવા મળે છે. મંદિર પરિસરમાં વિકસાવવામાં આવેલું પવિત્ર બિલ્વ વન આજે માત્ર એક વનસ્પતિ વિસ્તાર નહીં, પરંતુ ભગવાન શિવ પ્રત્યેની અખૂટ ભક્તિ, સુવ્યવસ્થિત સંચાલન અને હરિત વિચારધારાનું જીવંત પ્રતીક બની ઊભર્યું છે. આ બિલ્વ વન આશરે સાત વિઘા વિસ્તારમાં પથરાયેલું છે, જેમાં ૭૦૦ જેટલા બિલ્વ (બીલી)ના વળક્ષો સુસજ્જ રીતે ઉગાડવામાં આવ્યા છે. આ તમામ વળક્ષોનું સંવર્ધન વૈજ્ઞાનિક પદ્ધતિઓ સાથે ધાર્મિક ભાવનાને જોડીને કરવામાં આવે છે. અહીંથી દરરોજ નવા તથા જુના સોમનાથ મંદિર માટે બિલ્વ પત્ર મોકલવામાં આવે છે અને બંને મંદિરોમાં ભગવાન શિવના શિવલિંગ પર વિધિવત રીતે બિલ્વ પત્ર અર્પણ કરવામાં આવે છે.
શંખ ચોક પાસે ઉપરાંત અન્ય બે સ્થળોએ આવા વનો બનાવવામાં આવ્યા છે. શંખ ચોક સ્થિત આ પવિત્ર બિલ્વ વનની સ્થાપના વર્ષ ૨૦૦૧માં કરવામાં આવી હતી. છેલ્લા બે દાયકાથી વધુ સમયથી આ વન શ્રદ્ધાળુઓની ભક્તિને આધાર આપતું આવ્યું છે. ખાસ કરીને પવિત્ર શ્રાવણ માસ દરમિયાન અહીંથી સવા લાખ જેટલા બિલ્વ પત્ર મંદિરને મોકલવામાં આવે છે, જે ભગવાન શિવ પ્રત્યેની આસ્થા અને પરંપરાની મહત્ત્વપૂર્ણ કડી બની રહે છે. આ રીતે સોમનાથનું બિલ્વ વન પર્યાવરણ સંરક્ષણ, ધાર્મિક પરંપરા અને સુવ્યવસ્થિત આયોજનનો ઉત્તમ સમન્વય રજૂ કરે છે. (પ-ર૧)
(11:34 AM IST)
છેલ્લા 8 દિવસમાં સૌથી લોકપ્રિય 
