ભાવનગરઃ  ભાવનગરમાં એક અત્યંત ચકચારી અને હૃદય કંપાવનારી ઘટના સામે આવી છે, જ્યાં છેલ્લા 10 દિવસથી ગુમ થયેલા એક ફોરેસ્ટ અધિકારીના પરિવારના ત્રણ સભ્યોના મૃતદેહ ફોરેસ્ટ કોલોની નજીક એક ખાડામાંથી દાટેલી હાલતમાં મળી આવ્યા છે. મૃતકોમાં અધિકારીના પત્ની નયનાબેન રબારી (40), 13 વર્ષની પુત્રી પ્રુથા રબારી અને 9 વર્ષીય પુત્ર ભવ્ય રબારીનો સમાવેશ થાય છે. મૃતદેહોને દાટી દેવાયેલા હોવાથી, પોલીસે આ ઘટના હત્યા કરીને પુરાવાનો નાશ કરવાનો ગંભીર ગુનો હોવાની પ્રબળ આશંકા સાથે તપાસના ચક્રો ગતિમાન કર્યા છે.
મળતી માહિતી મુજબ, ફોરેસ્ટ અધિકારીનો પરિવાર મૂળ સુરત ખાતે સંયુક્ત રીતે રહે છે. થોડા દિવસ અગાઉ, નયનાબેન તેમના બે સંતાનો સાથે વેકેશન કરવા ભાવનગર આવ્યા હતા. વેકેશન પૂરું થયા બાદ ત્રણેય સુરત જવા માટે નીકળ્યા હોવાનું જણાવાયું હતું, પરંતુ તેઓ સુરત ન પહોંચતા પરિવારજનોમાં ચિંતા વ્યાપી હતી. માતા અને બંને બાળકો **મોબાઈલ ઘરે મૂકીને** ગયા હોવાથી તેમની શોધખોળ મુશ્કેલ બની હતી અને આખરે પરિવારજનોએ ભરતનગર પોલીસમાં જાણવા જોગ નોંધાવી હતી.
જોકે, ગુમ થયેલા આ ત્રણેય સભ્યોના મૃતદેહ ભાવનગરના તળાજા રોડ પર આવેલા ફોરેસ્ટ કોલોની નજીક એક ખાડામાંથી મળી આવતા મામલો હત્યાનો હોવાનું સ્પષ્ટ થયું છે. આ ઘટનાની જાણ થતાં જ ભાવનગર પોલીસનો **ઉચ્ચ કાફલો** તુરંત સ્થળ પર પહોંચી ગયો હતો. પોલીસે મૃતદેહોનો કબજો લઈને પોસ્ટમોર્ટમ માટે મોકલી આપ્યા છે. પીઆઈ કુરેશીના જણાવ્યા મુજબ, પોલીસે અગાઉ સીસીટીવી ફૂટેજ સહિતની તપાસ હાથ ધરી હતી, પરંતુ હવે મૃતદેહ મળી આવતા હત્યાના એન્ગલથી ઊંડાણપૂર્વક તપાસ શરૂ કરવામાં આવી છે.
ફોરેસ્ટ અધિકારીના પત્ની અને બે નિર્દોષ સંતાનોની આ ઘાતકી હત્યાથી સમગ્ર ભાવનગર શહેરમાં હાહાકાર મચી ગયો છે. હત્યા કરનાર કોણ છે અને હત્યાનું કારણ શું છે, તે અંગે પોલીસ હવે મૃતક મહિલાના પતિ અને અન્ય નજીકના સંબંધીઓ પર ધ્યાન કેન્દ્રિત કરીને ઊંડાણપૂર્વક તપાસ કરી રહી છે. પોલીસ આ ટ્રીપલ મર્ડર અને પુરાવા નષ્ટ કરવાના ગુનાના ભેદને ઉકેલવા માટે કમર કસી રહી છે.