(વિનોદ ગાલા દ્વારા)ભુજ તા.૧૩ : કચ્છના ભચાઉ તાલુકાના વાંઢીયા ગામે ખેતરમાંથી બળજબરીપૂર્વક વીજલાઈન નાખવા મુદ્દે અદાણી કંપની અને ખેડૂતો વચ્ચે ૨ મહિનાથી ઘર્ષણ ચાલુ છે. ગઈકાલે ફરી એકવાર અદાણી કંપની દ્વારા વીજલાઈન નાખવા બાબતે ખેતરમાં કામગીરી હાથ ધરાતા ખેડૂત પરિવારોએ કરેલ વિરોધના પગલે તંત્ર અને પોલીસ દ્વારા અટકાયત સહિતની કામગીરી કરાઈ હતી. તે વચ્ચે આજે ભારતીય કિસાન સંઘ દ્વારા ખેડૂતોની તરફેણમાં ખેડૂતોનો અવાજ રજૂ કરવા ખેડૂત મહાસભાનું આયોજન કરાયું હતું. પરંતુ મળતી જાણકારી મુજબ આજે સવારે કચ્છ જિલ્લા ભારતીય કિસાન સંઘના રાપર અને ભચાઉ તાલુકાના કિસાન સંઘના નેતાઓને વહેલી સવારે ગામડાઓમાંથી પોલીસ દ્વારા ઉઠાવી લેવામાં આવ્યા છે. કારણકે આજે કિસાન સંઘ દ્વારા મહાસભાનું આયોજન કરવામાં આવ્યું હોઈ તેનાથી ડરીને સરકાર દ્વારા અદાણી કંપનીના તરફેણમાં કિસાન નેતાઓને અટકાયતમાં લઈ લેવામાં આવ્યા હોવાનું જાણવા મળે છે. જોકે, અત્યારે ખેડૂત વર્ગ મહાસભાની જગ્યા પર પહોંચી રહ્યા છે ત્યારે હવે આગળ જોવાનું રહ્યું સભા થશે કે નહીં? પોલીસ અને તંત્ર ખેડૂતોને સભા કરવા દેશે કે નહીં?