હળવદ: ગુજરાતમાં સરકારી જમીનો પચાવી પાડવાનું એક મોટું કૌભાંડ પ્રકાશમાં આવ્યું છે. મોરબી જિલ્લાના હળવદ તાલુકાના કોયબા, ઘનશ્યામપુર અને સુંદરીભવાની ગામની સરકારી જમીનોના બનાવટી રેવન્યુ રેકોર્ડ ઊભા કરીને જમીન હડપ કરવાનું આયોજનબદ્ધ કાવતરું આચરવામાં આવ્યું હતું. આ ગંભીર મામલે હળવદના એક્ઝિક્યુટિવ મેજિસ્ટ્રેટ અને મામલતદાર અલ્કેશભાઈ પી. ભટ્ટે કુલ ૯ આરોપીઓ, જેમાં મહિલાઓનો પણ સમાવેશ થાય છે, તેમની વિરુદ્ધ પોલીસ ફરિયાદ નોંધાવી છે.
ફરિયાદમાં જણાવાયું છે કે આ ૯ આરોપીઓએ મળીને એક મોટું કાવતરું રચ્યું હતું, જેમાં સરકારી કચેરીઓના બનાવટી ખોટા રબ્બર સ્ટેમ્પ બનાવવામાં આવ્યા હતા. આ સ્ટેમ્પનો ઉપયોગ કરીને જે તે સમયના સક્ષમ સત્તાધિકારીઓની ખોટી સહીઓ અને ખોટા હુકમો તૈયાર કરવામાં આવ્યા હતા. આ બનાવટી દસ્તાવેજોના આધારે, સરકારી કચેરીઓના રેકોર્ડમાં આ જમીનોની નોંધ પોતાના નામે કરાવી લેવામાં આવી હતી, જેથી સરકારી જમીન પચાવી પાડવાનો તેમનો સમાન ઈરાદો પાર પાડી શકાય.
મામલતદારની ફરિયાદના આધારે હળવદ પોલીસે તાત્કાલિક કાર્યવાહી કરીને કુલ ૯ આરોપીઓ વિરુદ્ધ ગુનો નોંધ્યો છે. પોલીસે કાર્યવાહીના ભાગરૂપે ચાર મુખ્ય આરોપીઓને ઝડપી લીધા છે, જેમાં છગનભાઈ ધારિયા, માવજીભાઈ રાઠોડ, હમીરભાઈ વનાણી અને દિનેશભાઈ વનાણીનો સમાવેશ થાય છે. પોલીસે આ તમામ આરોપીઓની કાયદેસર કાર્યવાહી શરૂ કરી દીધી છે.
આ જમીન કૌભાંડમાં બનાવટી દસ્તાવેજો અને ખોટા સ્ટેમ્પનો ઉપયોગ થવો, એ દર્શાવે છે કે આ એક ઊંડા મૂળ ધરાવતું ગુનાહિત ષડયંત્ર હતું. પોલીસ હવે બાકીના ફરાર આરોપીઓને ઝડપી લેવા તેમજ આ કૌભાંડમાં અન્ય કોઈ સરકારી કર્મચારીઓ કે હોદ્દેદારો સંડોવાયેલા છે કે કેમ, તે દિશામાં સઘન તપાસ ચલાવી રહી છે.