તાલાલા :વેસ્ટર્ન ડિસ્ટર્બન્સની અસરના ભાગરૂપે પડી રહેલા કમોસમી વરસાદનું ગ્રહણ ફળોના રાજા ગણાતા કેસર કેરી પર પણ જોવા મળી રહ્યો છે. જ્યારથી માવઠા શરૂ થયા, ત્યારથી તાલાલા માર્કેટ યાર્ડમાં દરરોજ કેસર કેરીના ઢગલે-ઢગલા ઠલવાઈ રહ્યા છે. બીજી તરફ કેરીની આવક વધે છે, તો સામે ભાવ પણ ધરખમ તૂટી રહ્યાં છે.

તાલાલા માર્કેટિંગ યાર્ડ બજાર સમિતિ દ્વારા જાહેર કરવામાં આવેલા આંકડા અનુસાર, આજે માર્કેટ યાર્ડમાં આજે 22,960 જેટલા કેસર કેરીના બોક્સની આવક થઈ હતી. જ્યારે ભાવની વાત કરવામાં આવે તો, 10 કિલો કેસર કેરીના બોક્સનો સૌથી નીચો ભાવ 300 અને ઊંચો ભાવ 850 બોલાયો હતો.

આજથી લગભગ પંદરેક દિવસ પહેલા 10 કિલો કેસર કેરીના એક બોક્સનો ભાવ 1000 થી 1500 રૂપિયા બોલાતો હતો. જો કે ભારે પવન સાથે પડી રહેલા કમોસમી વરસાદના કારણે અનેક ઠેકાણે કેરીઓ ઝાડ પરથી ખરી પડી છે. આ ઉપરાંત પાણી લાગવાના કારણે કેરી પર ડાઘા પડી ગયા છે. જેના પરિણામે કેરીનો સ્વાદ અને સોડમ પહેલા જેવા નથી રહ્યાં. જેથી ખેડૂતો જેમ બને તેમ જલ્દી કેરીના પાકનો નિકાલ કરવા માંગતા હોય, માર્કેટ યાર્ડ અધધ કેરીઓથી છલકાઈ રહ્યું છે. જો કે એક વાત નક્કી છે કે, આ વર્ષે કેસર કેરીની સિઝન લાંબી નહીં ચાલે.

ગત 26 એપ્રિલે જ્યારે ગીરમાં કેરીની સિઝન શરૂ થઈ, ત્યારે સમગ્ર સોરઠ પંથકમાં કેરીનું સારું એવું ઉત્પાદન થવાની આશા હતા. જો કે વાતાવરણમાં સતત ફેરફાર થવાના કારણે પાકના મોર બળી ગયા છે. બીજી તરફ પાક તૈયાર થવાની સાથે જ માવઠું પડવાના કારણે કેરીઓ બગડી ગઈ છે.