રાજકોટ તા. ૧૮ :.. રાજકોટ જીલ્લાના ઉપલેટા તાલુકામાં આજે મેઘરાજાએ સટાસટી બોલાવી છે અને અનેક વિસ્‍તારોમાં પ થી ૭ ઇંચ વરસાદ તૂટી પડયો છે.

ઉપલેટા - ધોરાજી તાલુકાના ઓસમ પર્વત ઉપર અને આસપાસના વિસ્‍તારોમાં આજે મેઘરાજા મહેરબાન થતા સર્વત્ર પાણી - પાણી થઇ ગયું હતું.

ઓસમ પર્વત ઉપરથી વરસતા વરસાદના પાણીથી નયનરમ્‍ય નજારો જોવા મળ્‍યો હતો. ઓસમ પર્વત ઉપરથી વરસાદી પાણી વહેણ રૂપે નીચે આવતા નજરે પડયા હતાં.

આ ઉપરાંત ઉપલેટા, તાલુકાના લાઠ, ભીમોરા, તલંગણામાં પ થી ૭ ઇંચ વરસાદ પડયો હતો. જયારે મેરવદરમાં ૪ થી પ ઇંચ વરસાદ ખાબયો હતો.

ઉપલેટા-ધોરાજી પંથકમાં વરસાદ વરસતા સર્વત્ર પાણી-પાણી થઇ ગયુ છે. અને વાતાવરણમાં ઠંડક પ્રસરી ગઇ છે.