(વિનોદ ગાલા દ્વારા) ભુજ, તા.૧૫: કચ્‍છમાં આજે બીજે દિવસે પણ મેઘમહેર દ્વારા મેઘરાજાએ અછતના સંકટને હળવું કર્યું છે. આજે બીજા રાઉન્‍ડમાં સવારે ૬ વાગ્‍યાથી સવારે ૧૦ વાગ્‍યા સુધી માંડવીમાં ૬ ઇંચ વરસાદ ખાબકયો હતો. એક સામટા ભારે વરસાદને પગલે માંડવી શહેર પાણી પાણી થઈ ગયું છે. જ્‍યારે આજે સવારે ૬ થી ૧૦ વાગ્‍યા સુધીમાં ભુજમાં અઢી ઇંચ, મુન્‍દ્રા દોઢ ઇંચ, લખપત, અંજાર, નખત્રાણા, અબડાસા, ગાંધીધામમાં એક ઇંચ વરસાદ પડ્‍યો છે. આ લખાય છે ત્‍યારે સવારે ૧૦ વાગ્‍યે હજી પણ કયારેક ધીમો તો કયારેક ધોધમાર વરસાદ ચાલુ જ છે. ગઈકાલ અને આજ એમ બે દિવસના આંકડા જોઈએ તો ગઈકાલ સોમવારના સવારે ૬ થી આજ મંગળવાર સવારે ૧૦ વાગ્‍યા સુધી ૨૮ કલાકમાં કચ્‍છના દસે દસ તાલુકામાં પડેલા વરસાદના આંકડા આ મુજબ છે. લખપત ચાર ઈંચ, રાપર અઢી ઇંચ, ભચાઉ પાંચ ઇંચ, અંજાર નવ ઇંચ, ભુજ સાડા છ ઇંચ, નખત્રાણા સાડા ત્રણ ઇંચ, અબડાસા સાડા ત્રણ ઇંચ, માંડવી સાડા આઠ ઈંચ, મુન્‍દ્રા સાડા પાંચ ઇંચ, ગાંધીધામ ૬ ઇંચ. એકંદરે મોડે મોડે કચ્‍છમાં સાર્વત્રિક સારા વરસાદને પગલે ખેડૂતો, પશુપાલકો ખુશ છે. જળાશયોમાં નવા નીર આવતા પીવાના પાણીનું સંકટ પણ હળવું થશે.