(જયેશ ભટ્ટાસણા દ્વારા)ટંકારા તા.૨૩ :               બંગાળની ખાડીમાં છેલ્લા કેટલાક દિવસોથી સક્રિય ઊંડા દબાણે હવે ચક્રવાતી વાવાઝોડાનું સ્વરૂપ ધારણ કર્યું છે. ઉત્તર આંધ્ર પ્રદેશ અને ઓડિશાના દરિયાકાંઠા નજીક બનેલી આ સિસ્ટમને આંતરરાષ્ટ્રીય હવામાન એજન્સી JTWC (Joint Typhoon Warning Center) દ્વારા સત્તાવાર રીતે *ઉષ્ણકટિબંધીય ચક્રવાત 01B* તરીકે જાહેર કરવામાં આવી છે. આમ, વર્ષ 2026 ના ચોમાસા બાદ બંગાળની ખાડીમાં બનેલું આ પ્રથમ ચક્રવાત છે.

હવામાન વિભાગના તાજા સેટેલાઇટ અપડેટ મુજબ કેન્દ્રીય દબાણ  સિસ્ટમનું હવાનું દબાણ ઘટીને લગભગ 991 હેક્ટોપાસ્કલ (hPa) થઈ ગયું છે.પવનની ઝડપ સિસ્ટમની આસપાસ સતત પવનની ઝડપ 35 નોટ્સ (આશરે 65 કિમી પ્રતિ કલાક) નોંધાઈ રહી છે. આગામી 12 કલાકમાં સિસ્ટમ વધુ તાકાત મેળવીને 40 નોટ્સ (લગભગ 75 કિમી પ્રતિ કલાક) સુધી પહોંચી શકે છે.

સમુદ્ર સપાટીનું તાપમાન હાલ ખૂબ જ ગરમ હોવાને કારણે આ સિસ્ટમને સતત ઊર્જા મળી રહી છે. તેના કારણે કેન્દ્રની ફરતે નવા-નવા વરસાદી વાદળોના પટ્ટા (Convective Bands) સતત વિકસી રહ્યા છે. જોકે જમીનની નજીક આવવાને કારણે વાતાવરણમાં પવનનું કાતરાણું (Wind Shear) વધ્યું છે, જે તેને ખૂબ ઝડપથી મજબૂત થતા અટકાવી શકે છે.તેમ વેધર એક્સપર્ટ ઉત્તમ માળીએ જણાવ્યું છે.

આ સિસ્ટમની સૌથી મોટી ખાસિયત તેની ખૂબ જ ધીમી ગતિ છે. બંને બાજુ રહેલા હવાના દબાણના પટ્ટાઓના કારણે સિસ્ટમ લગભગ સ્થિર થઈ ગઈ છે. આ ધીમી ગતિને કારણે એક જ વિસ્તારમાં લાંબા સમય સુધી વરસાદ થવાનું જોખમ વધી જાય છે.હાલના ટ્રેક મુજબ આ સિસ્ટમ ઉત્તર આંધ્ર પ્રદેશના વિશાખાપટ્ટણમ નજીક જમીન સાથે અથડાઈ (Landfall) શકે છે.

 આગામી 24 થી 48 કલાક ઉત્તર આંધ્ર પ્રદેશ અને ઓડિશાના દરિયાકાંઠાના જિલ્લાઓ માટે અતિ મહત્વના છે. લેન્ડફોલ પોઈન્ટની આસપાસ કેટલાક વિસ્તારોમાં અત્યંત ભારે વરસાદ (Extremely Heavy Rainfall) થવાની શક્યતા છે.

     દરિયાકાંઠે 60-75 કિમીની ઝડપે પવન ફૂંકાશે અને દરિયામાં ખૂબ જ ખરાબ સ્થિતિ (Very Rough Sea) રહેશે. માછીમારોને દરિયો ન ખેડવા સૂચના આપવામાં આવી છે.

ભારતની સત્તાવાર એજન્સી *IMD (ભારતીય હવામાન વિભાગ)* આ સિસ્ટમને હજુ ડીપ ડિપ્રેશન તરીકે દર્શાવી રહી છે, ત્યારે આગામી બુલેટિન પર સૌની નજર મંડાયેલી છે.તેમ વેધર એક્સપર્ટ ઉત્તમ માળીએ જણાવ્યું છે.