પ્રવીણ વ્યાસ દ્વારા, મોરબી : મોરબીના જેતપર ગામે વીજલાઈનના યોગ્ય વળતર મેળવવાની માંગણી સાથે ખેડૂતો દ્વારા ચલાવવામાં આવી રહેલા આમરણાંત ઉપવાસ આંદોલનનો આજે ૧૩મો દિવસ છે. આ આંદોલન જેમ જેમ આગળ વધી રહ્યું છે તેમ તેમ આંદોલનકારીઓની શારીરિક સ્થિતિ પર તેની ગંભીર અસરો જોવા મળી રહી છે. આજે આંદોલનના ૧૩મા દિવસે વધુ એક ઉપવાસી ખેડૂતની તબિયત અચાનક નાદુરસ્ત થતાં તેઓને તાત્કાલિક સારવાર અર્થે જેતપર ખાતે આવેલી હોસ્પિટલમાં ખસેડવામાં આવ્યા છે.

**આજે સવારે જ વધુ બે ખેડૂતો ઉપવાસમાં જોડાયા હતા:**
જેતપર પંથકમાં પોતાની જમીનમાંથી પસાર થતી વીજલાઈનના વળતરના પ્રશ્ને ખેડૂતો દ્વારા લાંબા સમયથી લડત ચલાવવામાં આવી રહી છે. આ ન્યાયી લડતમાં આસપાસના ગામેગામથી મોટી સંખ્યામાં ખેડૂતો આવીને ઉપવાસીઓનો જુસ્સો સતત વધારી રહ્યા છે અને આંદોલનને મજબૂત સમર્થન પૂરું પાડી રહ્યા છે. ગઈકાલ સુધી આ છાવણી ખાતે કુલ ૯ ખેડૂતો આમરણાંત ઉપવાસ પર બેઠા હતા. આ આંદોલનને વધુ વેગ આપવા માટે આજે ૧૩મા દિવસે સવારે વધુ ૨ ખેડૂતો આ ઉપવાસ આંદોલનમાં જોડાયા હતા, જેમાં વાકિયા ગામના ખેડૂત મહેશભાઈ ચતુરભાઈ મારવાણીયાનો પણ સમાવેશ થાય છે.

**રાત્રિના સમયે ઓચિંતી તબિયત બગડતા દોડધામ મચી:**
આજે સવારથી જ અન્ન-જળનો ત્યાગ કરીને ઉપવાસ ઉપર બેઠેલા વાકિયા ગામના ખેડૂત મહેશભાઈ ચતુરભાઈ મારવાણીયાની શારીરિક સ્થિતિ અત્યારે રાત્રિના સમયે ઓચિંતી ખૂબ જ લથડી ગઈ હતી. તેઓની તબિયત બગડતા જ આંદોલન છાવણી અને હાજર અન્ય ખેડૂતોમાં ભારે ચિંતાની લાગણી ફેલાઈ ગઈ હતી અને દોડધામ મચી ગઈ હતી. ખેડૂતો દ્વારા તુરંત જ ૧૦૮ ઇમરજન્સી એમ્બ્યુલન્સ સેવાને જાણ કરવામાં આવી હતી. ત્યારબાદ તેઓને તાત્કાલિક અસરથી ૧૦૮ મારફત જેતપર ખાતેની સરકારી હોસ્પિટલમાં લઈ જવામાં આવ્યા છે, જ્યાં હાલના તબક્કે તબીબોની દેખરેખ હેઠળ તેઓની સઘન સારવાર ચાલી રહી છે.